Qazaq boksshylaryna qaıran qalam - Ulybrıtanııa quramasynyń bas bapkeri
ASTANA. QazAqparat - Elimizge tórt el týrnırine kelgen Ulybrıtanııa quramasynyń bas bapkeri Devıd Elloýeı qazaqstandyq boksshylardyń deńgeıine jáne jattyǵý jaǵdaılaryna qarap, tańdanysyn jasyra almady.
«Biz bokstan Qazaqstan quramasynyń tehnıkalyq jaraqtalýyna qarap, qatty tańǵaldyq. Aýa raıynyń kez kelgen sýyǵyna shydap, jattyǵý jasaı beretin sizderdiń boksshylaryńyzdy kórgende, tipten qaıran qaldyq. Biz Astanaǵa kelgende munda -18 jáne -22 gradýs sýyqtyqty kórsetip turdy. Bul - bizdiń óńimizge kirip-shyqpaıtyn dúnıe», - deıdi brıtandyq bapker búgin Astanada Ulybrıtanııa, Qazaqstan, Ózbekstan jáne Reseı qurama komandalarynyń matchtyq kezdesýi aldynda ótken baspasóz máslıhatynda.
Onyń aıtýynsha, brıtanııa sportshylary úshin Qazaqstan, Reseı jáne Ózbekstan quramalarymen qolǵap túıistirý úlken mańyzǵa ıe. Sebebi bul elder úzdikter qatarynan sanalady.
«Biz úshin bul týrnırde birge jekpe-jekter ótkizý - úlken mártebe. Joldastyq kezdesý bolsa da, munda álemniń eń myqty boksshylary sharshy alańǵa shyǵady. Biz Anglııada qazaq boksshylarymen birneshe ret judyryqtasqan bolatynbyz. Al Ulybrıtanııa quramasy 2013 jylǵy Almatydaǵy Álem chempıonatyn esepke almaǵanda Qazaqstanǵa alǵash ret kelip otyr», - dedi D.Elloýeı.
Aıta keteıik, tórt el týrnıri 16-19 aqpan aralyǵynda Astanadaǵy «Jastar» saraıynda ótetin bolady.
