Qazaq boksshylarynyń fotosy Parıj kóshelerine ilindi
PARIJ. KAZINFORM — Qazaqstandyq boksshylardyń fotosy Olımpıada qarsańynda Parıj tórine ilindi. Bul jaıynda Qazaqstan boks federatsııasynan habarlandy.
Atap aıtqanda, Sáken Bıbosynov, Qamshybek Qońqabaev, Nurbek jáne Aıbek Oralbaılardyń fotosy Parıj kóshelerine ilingen.
Eske salaıyq, qazaq boksshylary Parıjge keshe, 21 shildede attandy.
Bylǵary qolǵap sheberleri Almaty áýejaıynan Frantsııaǵa ushty. Bortta on olımpıada úmiti, bapkerler, sparrıng seriktester jáne ǵylymı top músheleri bar.
25 shilde jerebe tartý rásimi ótedi. Sol kúni otandyq boksshylardyń qaı ýaqytta sharshy alańǵa shyǵatyny anyqtalady.
Aıta keteıik, Parıj Olımpıadasyna bokstan erler quramasy tolyq quramda bara jatyr.
Erlerden Sáken Bıbosynov, Mahmud Sabyrhan, Muhammedsabyr Bazarbaıuly, Aslanbek Shymbergenov, aǵaıyndy Nurbek Oralbaı men Aıbek Oralbaı jáne Qamshybek Qońqabaev el namysyn qorǵasa, áıelderden Nazym Qyzaıbaı, Karına Ibragımova jáne Valentına Halzova úsh salmaqta sharshy alańǵa shyǵady.
Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyzdyń alǵashqy legi Parıjdegi olımpıadalyq qalashyqqa baryp úlgerdi.
Aıta keteıik, 4 kúnnen keıin tórtkúl dúnıe kóz tigetin tórtjyldyq doda bastalady.
Qazaqstan quramasy atalǵan oıyndarǵa sporttyń 25 túrinen 92 joldama jeńip alǵan.
