Qazaq boksshylarynan alǵashqy Olımpıada joldamasyna qol jetkizgen Qońqabaev
ASTANA. KAZINFORM – Búgingi tańda Qazaqstan sportshylary tórt jyldyqtyń basty dodasy – Parıj Olımpıadasynyń joldamalary sarapqa salynatyn irikteý syndaryna qatysyp, mańdaı terlerin tógip jatyr.
QR Týrızm jáne Sport mınıstrligi málim eketkendeı, Olımpıada oıyndarynyń bastalýyna sanaýly aılar ǵana qaldy. Sol sebepti, sportshylar úshin eń jaýapty jáne mańyzdy kezeń bastaldy deýge bolady. Óıtkeni aldaǵy jarty jylda olar Olımpıadaǵa joldama jeńip alýǵa tyrysyp, Parıjdegi dúbirli dodaǵa daıyndalýy kerek.
Endi sanaýly kúnderden keıin qazaq boksshylary Italııada ótetin lıtsenzııalyq týrnırde synǵa túsedi. Oǵan asa aýyr salmaqtaǵy Qamshybek Qońqabaev barmaıdy. Sebebi, ol Qytaıda ótken jazǵy Azııa oıyndarynda qazaq boksshylarynan birinshi bolyp Parıj Olımpıadasyna lıtsenzııa jeńip alǵan bolatyn. Sary qurlyq básekesiniń fınalynda ol óziniń syralǵy qarsylasy ózbekstandyq Bahodır Djalolovqa jol berip, jarystyń kúmis júldegeri atanǵan edi.
Qamshybek Qońqabaev 1991 jyly 18 qarashada Qyzylorda qalasynda dúnıege kelgen. Bokspen 2006 jyldan beri shuǵyldanady. Bozbala shaǵynan sportqa ıkemi bar ekenin baıqaǵan aǵasy Asqar Qońqabaev Qamshybekti boks úıirmesine jetelep alyp barǵan. Aıta keteıik, sportshynyń aǵasy da kezinde bokspen aınalysqan.
«Boks úıirmesine kelip, alǵashqy jattyǵýdan keıin osy sport túrin birden unattym. Sodan, aldyma álem jáne Olımpıada chempıony bolamyn degen maqsat qoıdym. Mine, búginde sol bala kúngi arman-maqsatyma jetý jolynda tynbaı eńbek etip kelemin», - deıdi keıipkerimiz.
Halyqaralyq jarystardyń bolashaq jeńimpazy men júldegeri bokstyń qyr-syryna alǵashqy jattyqtyrýshysy Seıitjan Tókenovtyń qolastynda júrip qanyǵa bastady. Bir qyzyǵy, sonaý 2006 jyly bastalǵan ustaz ben shákirt arasyndaǵy baılanys áli kúnge deıin jalǵasyp keledi. Qazirgi tańda Seıitjan Tókenov – Qamshybek Qońqabaevtyń jeke jattyqtyrýshysy. Shákirtine kúni búginge deıin tálim-tárbıe berip, jarystarǵa baptap júr.
Asa aýyr salmaqtaǵy boksshy 2021 jyly Japonııada ótken Olımpııa oıyndarynyń qola, byltyrǵy Azııa oıyndarynyń kúmis júldesin jeńip aldy. Sonymen qatar ol – álem birinshiliginiń tórt dúrkin, Azııa chempıonatynyń eki dúrkin kúmis júldegeri.
Qamshybekten karerasyndaǵy eń qıyn jarysy týraly suradyq.
«Óz basym, qatysqan týrnırlerimdi ońaı-qıyn dep bólmeımin. Barlyq jarysqa júz paıyz daıyndalyp, el namysyn abyroımen qorǵasam eken dep baramyn. Dese de, úlken dúbirili dodalardyń jartylaı fınaly, fınal jekpe-jekteri árqashan tartysty ári qıyn ótedi. Óıtkeni kil myqtylar iriktelip keledi. Al kareramda fızıkalyq jaǵynan, psıhologııalyq turǵydan qıyn bolǵan jarys – Tokıo Olımpıadasy. Óıtkeni jarystyń atmosferasy, aýrasy basqa dodalarǵa qaraǵanda erekshe boldy», - deıdi boksshy.
Qazirgi ýaqytta Qamshybek ulttyq quramamen birge Almatyda tórtjyldyqtyń basty dodasyna qarqyndy daıyndalyp jatyr.
«Olımpıadaǵa daıyndyq oıdaǵydaı júrip jatyr. Almaty oblysyndaǵy «Aqbulaq» Olımpıadalyq ortalyǵynda Ázerbaıjan boksshylarymen birlesken oqý-jattyǵý jıynyn ótkizip jatyrmyz. Olımpıadaǵa az ýaqyt qaldy. Parıjdegi dodada sátti óner kórsetip, armanymyzǵa qol jetkizý úshin daıyndyqty bir sátke de toqtatpaı, únemi sheberligimizdi shyńdap otyrý kerek», - deıdi boksshy.
Bir aıta keterligi, Qamshybek bala kúninen dop tepkendi qatty unatady. Sondyqtan oqý-jattyǵýdan, jarystardan qoly bosaı qalǵanda dostarymen fýtbol oınaıdy. Sonymen qatar bos ýaqytynda otbasyna kóńil bólip, bala-shaǵasymen qydyrǵandy jaqsy kóredi.
