Qazaq boksshylary Parıjden kemi bir altyn alady - Ermahan Ybraıymov
ASTANA. KAZINFORM – Boksshy, halyqaralyq sport sheberi, 2000 jylǵy Sıdneı Olımpıadasynyń jeńimpazy Ermahan Ybraıymov Parıjde qaı boksshyǵa senim artatynyn aıtty.
- Ermahan Saǵıuly, aldaǵy jazǵy Olımpıadada qaı boksshydan úmit kútesiz?
- Negizi aldyn-ala anaý altyn, mynaý kúmis, ol qola alady dep aıtý durys emes. Ondaı boljam ulttyq quramdaǵy árbir boksshyǵa keri áserin tıgizbese, paıdasyn ákelmeıdi. Sondyqtan, barlyǵynan úmit kúte bileıik, barlyq boksshymyzǵa senim arta bileıik. Qazirgi ulttyq quramda júrgen jigitterimizdiń biri - álem chempıony, biri - Azııa oıyndarynyń júldegeri. Báriniń de kóp-kórim jetistikteri, tájirıbeleri bar. Sondyqtan, óz basym bárine senimmen qaraımyn. Keıde, múldem sen oılamaǵan, men oılamaǵan bir boksshy jaryq etip shyǵa kelýi múmkin. Meniń oıymsha, qazaq boksshylary Parıjden kemi bir altyn alady.
- Tokıo Olımpıadasyna deıin ár tórtjyldyqtyń basty dodasynan boksshylarymyz altynsyz kelmegen bolatyn. Tipti, 69 keli «qazaqtyń salmaǵy» atanyp ketken. 2020 jyldaǵy sátsizdikti aqtap alýǵa bola ma?
- Bir Olımpıadada altynsyz qalǵanymyz qazaq boksynyń qulap qalǵanyn, quldyrap ketkenin bildirmeıdi. Ol bizdiń boksshylar úshin de, bapkerler úshin de úlken sabaq boldy. Endi, Parıjde sol ketken olqylyqtyń orynyn toltyryp jatsa, nur ústine nur bolar edi. Rıng eshqashan qatelikti keshirmeıdi. Sol úshin men boksshylarymyzdyń barynsha sharshy alańda qatelikke boı aldyrmaı, bapkerdiń tapsyrmasyn buljytpaı oryndaýǵa tyrysý kerek. Jattyqtyrýshynyń keńesin eshqashan umytpaý kerek. Sharshy alańda judyryqpen birge basty da istete bilýleri tıis. Sonda ǵana jeńis tuǵyryna shyǵýǵa bolady.
- Bul kúnderi elimizdiń boks federatsııasynda kadrlyq ózgerister bolyp jatyr. Bul basty doda aldynda bizge ne berýi múmkin?
- Kadrlyq aýys-túıis boksshylarymyzdyń jattyǵýyna keri áserin jasamaýy kerek. Eń bastysy ulttyq quramanyń bas bapkeri óz ornynda qaldy. Olımpıada oıyndary taqap qalǵanda basshylyq ózgergenimen bapkerlik quram ózgermeýi tıis. Bul - meniń jeke kózqarasym. Endi, jańa kelip jatqan basshylyq boksshylarymyzǵa qoldaý kórsetip, alańsyz Olımpıadaǵa daıyndalýyna bar jaǵdaıdy jasaıdy degen úmittemiz.
- Ulttyq olımpıadalyq komıtetinde de úlken ózgerister oryn alǵaly jatqanyn estip jatyrmyz. Atalǵan mekemeni belgili kásipqoı boksshy Gennadıı Golovkın basqarady degen áńgime áleýmettik jelide jeldeı esip júr. Osy týraly ne aıtar edińiz?
- Bul áńgimeni men de ózderińiz sııaqty sol áleýmettik jeliden estip, oqyp otyrmyn. Naqtysyn bilmeımin. Ony olımpıadalyq komıtettiń ózinen suraý kerek shyǵar.
- Eger, Golovkın kelgen jaǵdaıda bul jaýapty qyzmettiń «júgin» kóterip júre alady dep oılaısyz ba?
- Múmkin. Ol jalǵyz bolmaıdy ǵoı. Keńesshisi, kómekshisi bolady degendeı. Ony ýaqyt kórsetedi.
