Qazaq boks tarıhynda birinshi ret egiz boksshylar Olımpıada medaline talasady

ASTANA. KAZINFORM – Qazaq boks tarıhynda alǵash ret egiz boksshylar bir Olımpıadada eki salmaqta el namysyn qorǵaıdy.

Bul týraly KAZINFORM tilshisine bokstan Ulttyq quramanyń bas bapkeri Myrzaǵalı Aıtjanov aıtyp berdi.

«Bokstan Býsto-Arsıtsıo qalasynda ótken álemdik irikteý kezeńinde 80 kelide el namysyn qorǵaǵan Nurbek Oralbaı men 92 keli salmaqtaǵy Aıbek Oralbaı ekeýi bir úıdiń balasy. Naqtyraq aıtsam, ekeýi bir qursaqty tepkilep birge týǵan egiz boksshylar. Mine, ekeýi de ulttyq qurama sapynda jattyǵyp, lıtsenzııalyq týrnırge birge bardy. Ekeýi de joldamaǵa qol jetkizdi. Osylaısha qazaq boks tarıhynda tuńǵysh ret egiz boksshylar Olımpıadada el namysyn qorǵamaq», - dedi bas bapker.

Esterińizge sala keteıik, Aıbek Oralbaı shırek fınalda AQSh boksshysy Djamar Tellıdi utyp, Parıj Olımpıadasyna joldama jeńip alsa, Nurbek Oralbaı 80 keli salmaqta el namysyn qorǵap, shırek fınalda Irlandııa boksshysy Kelın Kassıdıdi 3:2 esebimen tize búktirdi.

Atalǵan týrnırge Qazaqstan quramasynan alty boksshy attanyp, onyń beseýi Olımpıada joldamasyna ıe boldy.