Qazaq baýyrlaryma ortaq shańyraǵymyz úshin alǵys bildirgim keledi - Sergeı Vodko
QARAǴANDY. QazAqparat - Búgin Qaraǵandydaǵy Dostyq úıinde Alǵys kúni atap ótildi, dep habarlaıdy óńir ákimdiginiń resmı saıty.
Merekege oblys ákiminiń orynbasary Jandos Ábishev, basqarma basshylary, Qaraǵandy oblysynda qyzmet etetin barlyq etnomádenı ortalyqtardyń ókilderi qatysty.
Sharany uıymdastyrýshylar qoldanbaly óner buıymdarynyń kórmesin uıymdastyryp, bı ansamblderi men vokalshylardyń qatysýymen merekelik kontsert ázirledi.
«Qazaq halqynyń tarıhy - beıbitshilik pen dostyq kez kelgen qıyndyqtardy jeńe alatyny týraly áńgimeleıdi. Saryarqa jeri kóptegen etnostar úshin týǵan jerindeı bolyp ketti», - dedi Qaraǵandy oblysy ákiminiń orynbasary Jandos Ábishev. - Osy bir shýaqty kúni men shyn júrekten bizdiń barlyq etnomádenı birlestikterdiń ókilderine elimizdegi aýyzbirlikke qosqan úlesteri men jasaǵan ıgi isteri úshin alǵysymdy bildiremin».
Merekede sonymen qatar etnomádenı ortalyqtardyń ókilderi de sóz sóıledi. Qaraǵandy oblystyq «Polonııa» polıak qoǵamynyń tóraǵasy Vıtalıı Hmelevskıı: «Alǵys - eń mańyzdy sezimderdiń biri» dep esepteıdi.
"Biz Alǵys kúnin úshinshi jyl qatarynan atap ótip kelemiz. Bizdiń júregimizdegi alǵys sezimi - ol bizdiń qoǵamda beıbitshilik, yntymaqtastyq jáne birlikti qurý prıntsıperiniń saıasatynyń arqasy".
1 naýryz kúni halqymyz úshin qıyn-qystaý bolǵan kezeńder eske alynady: saıası qýǵyn-súrgin zamany men asharshylyq. Basty maqsat - sol qıyndyqtardy jeńýge kómektesken jandarǵa alǵys bildirý. 
- Meniń oıymsha, osynda jınalǵandardyń barlyǵy qazaq halqyna, Qazaqstan jerine osyndaı beıbit jáne jaıly ómir súrip jatqanymyz úshin alǵysy sheksiz, - dep atap ótti Qaraǵandylyq evreı mádenıeti ortalyǵynyń tóraǵasy Vılen Molotov-Lýchanskıı.
Qaraǵandy oblysynda 78 etnomádenı ortalyq qyzmet atqarady. Qazaqstan halqy Assambleıasy janynda Sergeı Vodko basqaratyn qaıyrymdylyq jasaýshylar men tálimgerler klýby qurylǵan.
- Bul kúni biz barlyǵymyzǵa ortaq qaıǵyly tarıhty eske alamyz. Qýǵyn-súrgin jáne qýdalaý kezinde adamdar bir-birine teris burylmaı, kerisinshe sózben aıtqyzsyz qamqorlyq pen janashyrlyq tanytty. Qazaqstan jeri mıllıondaǵan adamdar úshin baspana boldy. Qazaq baýyrlaryma osyndaı aǵaıyndardaı dostyǵymyz úshin, bizdiń ortaq jeńisterimiz ben ortaq shańyraǵymyz úshin alǵysymdy bildirgim keledi, - dedi Sergeı Vodko. 
Qazaqstanda Alǵys kúni 2016-shy jyldan beri atap ótiledi. Qaraǵandynyń barlyq aýdandarynda búgin Alǵys kúnine arnalǵan merekelik kontsertter men qaıyrymdylyq sharalary ótti.
