Qazaq batyrlary týraly mýltserıal 3D formatta kórsetilmek
ASTANA. 31 jeltoqsan. QazAqparat - Qazaqstandyq teleekrandardan balalarǵa arnalǵan «Batyrlar» 3D-anımatsıalyq mýltserıalynyń alǵashqy serııasy kórsetiledi,
dep habarlady Tehnologııalyq damý ulttyq agenttiginiń baspasóz qyzmetinen.
Mýltserıal jasaýshylardyń eń basty kózdegeni - Naýryzbaı batyr, Qabanbaı batyr jáne Bógenbaı batyr keıipkerleri arqyly qazaq halqynyń dástúrin, mádenıetin, ulttyq ereksheligin kórsetý.
Jalpy alǵashqy serııa 10 mınýtqa sozylady jáne onda 14 anımatsııalyq personaj bar.
«Kók ekrandarymyzda ulttyq salt-sanamyzǵa jat, jastarymyzdy qazaq tarıhynan alshaqtatatyn bóten keıipkerler óte kóp. Mýltserıal otandyq kórkem personajdarǵa, erjúrek batyrlarǵa toly, sondyqtan atalǵan olqylyqtyń ornyn toltyrýǵa atsalysady», - mýltserıaldyń kompıýterlik grafıka boıynsha prodıýseri Aınur Temirhanqyzy.
Onyń sózinshe, anımatsııalyq dúnıeni jasaýda optıkalyq júıelerdiń jáne sandyq tehnologııanyń eń zamanaýı ádisteri qoldanylǵan. 2011 jyldyń jeltoqsan aıynda kompanııa «Tehnologııalyq damý ulttyq agenttigi» AQ-nyń grantyna ıe bolǵan.
Grant qarjysy Vicon kompanııasynyń shyǵarǵan eń ozyq Motion Capture ınnovatsııalyq tehnologııasy satyp alyndy. Ol 3D anımatsııa jasaý barysyndaǵy shyǵyndardy 50 paıyzǵa deıin qysqartady. Motion Capture álemdik tájirıbede oıyn-saýyq, medıtsına, sport, ǵylym men ónerkásip syndy túrli salalarda qoldanylady.
«Eń basty basymdyq endi anımatsııa qolmen jasalmaıdy. Atalmysh tehnologııa anımatsııa óndirisin jasaý merzimin 10 esege deıin qysqartpaq», - deıdi A.Temirhanqyzy.
