«Qazaq batyrlary» serıalynyń basty keıipkeri Los-Anjeleste 2 altyndy jeńip aldy
ASTANA. QazAqparat - Qazaqstandyq Móldir Mekenbaeva Los Angeles Open týrnırinde djıý-djıtsý boıynsha 2 altyn medaldy jeńip aldy, dep habarlaıdy «SPORTINFORM».
Móldir 55 kg deıingi jáne absolıýtti salmaq dárejesinde joǵary marapatqa qol jetkizdi. Qos fınal da merziminen buryn Mekenbaevanyń jeńisimen aıaqtaldy.
«Men Amerıkadaǵy jattyǵý lagerine Azııa oıyndaryna ázirlený úshin kelgenmin. Osyndaı jarys ótetinin estip, birden qatysýǵa tirkeldim. Jekpe-jekter ońaı bolǵan joq. Negizi amerıkalyq djıý-djıtsý sheberleriniń myqty ekenin bári biledi. Biraq soǵan qaramastan men olardy jeńip kettim, tipti aıqas merziminen buryn aıaqtaldy. Tamyz aıynyń sońynda Indonezııada ótetin Azıadaǵa daıyndyq jumystaryn jalǵastyra beremin», - dedi Móldir Mekenbaeva.
Mekenbaeva sporttyq jarystarǵa qatysýdan bólek aktrısalyǵymen de tanymal. Ol «Muraǵa berilgen mahabbat», «Saıahatshy» sekildi fılmderde oınaǵan. Qazir sportshy «Qazaq batyrlary» atty tarıhı teleserıalǵa túsip jatyr. Ol jerde Móldir basty róldi somdaıdy.
Eske sala keteıik, Móldir Mekenbaeva bunyń aldynda Birikken Arab ámirlikterinde jáne Italııada ótken týrnırlerde altyn medal ıelengen bolatyn.
