Qazaq basynda oryn alǵan ashtyqty saıasılandyrýǵa qarsymyz, alaıda endigi jerde únsiz qalýǵa tıis emespiz- A. Smaıyl

Búgin Parlament Májilisiniń jalpy otyrysynda depýtat Aldan Smaıyl keńes dáýirinde qoldan uıymdastyrylǵan asharshylyq qurbandaryn eske alatyn ulttyq kúndi belgileý jóninde másele kóterip, Úkimet basshysynyń atyna saýal joldaǵan bolatyn. Osyǵan oraı, jýrnalısterge bergen suhbatynda A. Smaıyl asharshylyq máselesin saıasılandyrýǵa qarsy ekendigin jetkizdi, dep habarlaıdy QazAqparat.

«Qazaqstandaǵy asharshylyq asa aýyr jaǵdaıda ótti. Keıbir derekter boıynsha 1,5 mln., keıbirinde 3 mln.-ǵa tarta adam 1922-32 jyldar aralyǵynda ashtan qaza boldy. Shyndyǵynda da, bul Keńes odaǵynyń az ulttarǵa jasaǵan, qoldan uıymdastyrǵan qastandyǵy bolatyn», dedi depýtat.

Onyń aıtýynsha, Eýropa Keńesi Parlamenti Assambleıasy qabyldaǵan qararda bundaı adam aıtqysyz náýbetti eske alý kúnin belgileý, arnaıy zertteýler jasaý qajettigi atap kórsetilgen. Tipti Eýropa keńesi PA depýtattary Qazaqstanǵa kelip, osy máseleni arnaıy zertteýge nıet tanytypty. Óıtkeni, adamzat tarıhynda munshalyqty aýqymdaǵy qoldan uıymdastyrylǵan náýbet bolmaǵan kórinedi.

«Biz osy máselege tıisti nazar aýdarýymyz kerek. Onyń ústine osy uly náýbet qazaqty úlken demografııalyq, moraldyq apatqa ushyratty. Al bundaı ult basyndaǵy zobalań umytylmaýy kerek. Degenmen de, biz bul máseleni saıasılandyrǵymyz kelmeıdi. Óıtkeni, óter dúnıe ótti, ketti. Buǵan jaýap bersin degen talabymyz joq. Biraq, biz ózimiz sol jyldary qaıtys bolǵan azamattarymyzdyń rýhyn qurmetteýge tıispiz. Bul azamattyq, perzenttik, kerek bolsa ulttyq paryzymyz», dedi depýtat.

Onyń aıtýynsha, Keńester odaǵy ári sol ashtyqty uıymdastyrǵan kommýnıstik partııasy tarap ketkendikten, qazirgi tańda onyń resmı murageri qalyp otyrǵan joq. «Endigi bizdiń mindetimiz sol ashtyq máselesin óz tarıhymyz úshin, ózimiz bilýimiz úshin tolyq qaıta zertteý ári ony jyl saıyn atap ótý», dedi A. Smaıyl.