Qazaq basylymdarynyń qataryna «Qazaq sporty» gazeti qosyldy
ASTANA. Sáýirdiń 2-si. QazAqparat - Naýryz aıynyń sońǵy kúnderi qazaq basylymdarynyń qataryna «Qazaq sporty» gazeti qosylyp, sport dese «ishken asyn jerge qoıatyn» jankúıerler úshin, sportshylar úshin qýanyshty boldy.
Aptasyna bir ret, seısenbi kúni jaryq kóretin basylymnyń bas redaktory - belgili sport jýrnalısi Qydyrbek Rysbek. Al quryltaıshysy «Jarys» aımaqtyq qoǵamdyq birlestigi. Taralymy 10 myń danany quraıtyn basylym «Astana polıgrafııa» AQ-ynda basylady.
Basylymnyń bir ereksheligi, el sportynyń kemshilikteri men jetistikterin, jeńilisteri men jeńisterin saralaıtyn «Tarazy» aıdarynyń bolýy. Bul aıdar tek qana ólshem quralyna ǵana aınalmaı, sportshynyń namysyn oıatyp, kúsh-qaıratyn, jigerin janıtyn qaıraqqa aınalǵanyn qalaımyz. Taǵy bir ereksheligi - «Men qazaqpyn!» aıdary. Bul bólimde taǵdyrdyń jazýymen jumyr jerdiń ár qıyrynda turatyn qazaq sańlaqtary týraly syr shertedi. Sonymen qatar basylymnyń elimizdiń sportta úzdik jetistikterge jetip, álemdi aýyzyna qaratqan sańlaq sportshylaryn úlgi-ónege tutqan «Topjarǵan» aıdary da beıneti mol sport jolyndaǵy jetkinshekterimizge demeý, baǵdar bolatyndyǵy anyq.
Endeshe, «Qazaq sporty» gazetiniń jazary taýsylmasyn, álemdik jarystarda júldeli oryndarǵa ilikken sportshylarymyz jaıly súıinshi habarlar legin sport jankúıerlerine, oqyrmanǵa jetkize bersin dep tileıik.
