Qazaq baspasózindegi shoqtyǵy bıik basylymdardy zertteýge qarajat qol baılaý bolyp otyr - N.Omashev
ASTANA. 15 sáýir. QazAqparat /Kenjekeı Toqtamurat/ - Jalpyulttyq deńgeıge kóterilgen «Aıqap» jýrnaly áli tolyq zerttelmegen, al «Qazaqstan» gazetiniń beti múlde ashylmaı jatyr.
Bul týraly Eýrazııa ulttyq ýnıversıtetinde atalmysh eki basylymnyń 100 jyldyǵyna oraı ótip jatqan respýblıkalyq konferentsııada Jýrnalıstıka jáne saıasattaný fakýltetiniń dekany Namazaly Omashev aıtty.
«Aıqap» jýrnaly men «Qazaqstan» gazetiniń baǵyttary bir boldy, ekeýi de ulttyq qundylyqtardy dáriptedi, halyqtyń saýatyn ashýdy, birlikti maqsat tutty. Alaıda jalpyulttyq deńgeıge kóterilgen «Aıqap» jýrnaly áli tolyq zerttelmese, «Qazaqstan» gazetiniń betteri múlde ashylmaı jatyr deýge bolady», - dedi ol.
«Qazaq baspasózindegi shoqtyǵy bıik basylymdardy zertteýge qarajat qol baılaý bolyp otyr. Kezinde «Alash kósemsóziniń» 10 tomdyǵyn shyǵarýdy qolǵa alyp, Mádenıet mınıstrligine joba daıyndap usynǵanymyzda, qajetti qarajat bólingen edi. Keıin mınıstrlikte bolǵan ózgeristerge baılanysty qarajat tendrge salynyp, aqyr sońynda tolyq maqsatqa jumsalmady. 20-shy ǵasyrdyń basyndaǵy basylymdarymyz el aýmaǵynan tys qalalarda basylyp otyrǵan, sondyqtan ózge eldiń muraǵatyn aqtarý qajet. Al bunyń barlyǵy qyrýar qarajatty talap etedi», - deıdi N.Omashev.
N.Omashevtyń aıtýynsha, qazir ótken ǵasyrdyń 20-30 jyldaryndaǵy basylymdardy zertteý boıynsha úlken joba daıyndalý ústinde.
Sondaı-aq professor osy zertteýlerdi ǵylymı aınalymǵa engizý máselesine de toqtalyp ótti. Onyń birinshi tásili - zertteýlerdi kitap etip shyǵarý.
Konferentsııa barysynda sondaı-aq merzimdi baspasózdiń qalyptasýy men damý baǵyttarynyń zerttelýi, BAQ-taǵy adamı qundylyqtar jáne eldik múdde máseleleri talqylaný ústinde.
