«Qazaq Barbıi» halyqaralyq baıqaýdyń bas júldesin jeńip aldy

ASTANA. QazAqparat – 10 jastaǵy Ramına Satybaldy Armenııa astanasynda ótken halyqaralyq án baıqaýyna Qazaqstan atynan qatysyp, bas júldeni jeńip aldy, dep habarlaıdy QazAqparat tilshisi.

Jas ánshi Erevan tórinde «Qazaqpyn» jáne «Wrecking ball» ánderin shyrqap, eń joǵary upaı jınaǵan. Bul jeńisi arqyly ol Italııada ótetin «Viva Italia» baıqaýyna joldama alyp otyr. Aıta ketsek, «Golden Voice» atty baıqaýǵa AQSh, Reseı, Armenııa, Estonııa, Lıtva sııaqty birneshe eldiń 100-den astam úmitkeri qatysqan.

«Boztorǵaı» jáne «Shattyq» halyqaralyq baıqaýlarynyń dırektory, Halyqaralyq baıqaýlar men festıvalder qaýymdastyǵynyń múshesi, «Slavıanskıı bazar v Vıtebske» halyqaralyq óner festıvalindegi Qazaqstannyń resmı ókili Qarlyǵash Ábdikárimova habarlasyp, Ramına Qazaqstannyń atynan shyǵady dep aıtty. Qatty qýandyq, birden «Baramyz!» dedik. Dımash Qudaıbergen, Rýhııa Baıdúkenova sııaqty qazaq óneriniń maqtanyshtaryn alǵashqy iri baıqaýlarǵa alyp shyqqan bilikti mamannyń nazary bizdiń qyzymyzǵa aýǵanyna qatty qýanyshtymyz. Onyń Ramınaǵa qoıǵan «Barbı» degen laqap aty qazir keńinen taralyp ketti. Bári qyzymyzdy «Qazaq Barbıi» dep tanıdy», - dedi ánshiniń anasy Raýan Mirjúsipova.

Ramına 4 jasynan beri ánshilikpen áýestenip júr. Qazirdiń ózinde 50-ge jýyq halyqaralyq jáne respýblıkalyq óner baıqaýynda jeńiske jetip, «Uly dala daryny» tósbelgisin ıelengen. Ánnen bólek bı, vokal, gımnastıka, júzý, skvoshpen aınalysady. Dombyra, baraban, fortepıano aspaptaryn meńgergen.