Qazaq balýany Shámil Serikovtiń otbasy FILA marapatyn «Dınamo» sport qoǵamyna tapsyrdy

Ótken aıda Býdapesht qalasynda qazaq kúresi úshin óte qýanyshty jaǵdaı bolǵan edi. Onda FILA Shámil Serikov esimin dúnıedegi teńdesi joq palýandar qataryna qosyp, dańq murajaıyna engizgen bolatyn.

«Shámil Serikov qysqa ǵumyrynda bizdiń «Dınamo» sport qoǵamynda júrip Olımp shyńdaryn baǵyndyryp, qazaq palýandarynyń mártebesin kóterdi. Ondaı balýan 100 jylda bir týady desek artyq bolmas. Bapkerler árdaıym onyń kúresý tásiline úlken tańdanys bildiretin. 5 jyl ishinde sport sheberi atanyp, odan keıingi bes jylda Qazaqstannyń, KSRO-nyń, Eýropanyń jáne Álemniń 2 dúrkin chempıony atandy. Ol kezde KSRO-ny utý óte qıyn bolatyn. Al ony utqan adam Álem chempıonatyna jeńetin. Sondyqtan mundaı sportshyny FILA-nyń elep-eskerip jatqany oryndy. Jáne bul Qazaqstan boıynsha tuńǵysh ret bolyp otyrǵan oqıǵa», - deıdi «Dınamo» DShSQ tóraǵasynyń birinshi orynbasary Asqar Omarqulov.

"Áke kórgen oq jonar" degendeı, qazir dańqty palýannyń uldary Tımýr men Eldar ákesiniń jolyn qýyp, biri balýan, biri jattyqtyrýshy bolyp qyzmet atqaryp júr. Jattyqtyrýshylyqpen aınalysatyn Tımýrdyń armany ákesindeı myqty balýandy tárbıelep shyǵarý eken.

«FILA-nyń Qazaq elinen mundaı syı qurmetke ákemdi laıyq dep taýyp, orden tabystaǵanyna óte qýanyshtymyn. Bul marapatty tórimizge ilip qoıýǵa da bolar edi. Biraq ta januıamyzben aqyldasa kele, keleshek jastarymyz kórip qýansyn, kópshiliktiń tamashalaýyna múmkindik týsyn dep, «Dınamoǵa» tabystaýdy jón sanadyq. Ákemdi úlken sportqa qanattandyryp ushyrǵan «Dınamo» sport qoǵamynda búginde talantty jastar shoǵyry ósip keledi. Solarǵa úlgi bolsyn degen nıetpen osyndaı kelisimge keldik», - deıdi Tımýr Shámilov.