Qazaq balýandary London olımpıadasynda keminde úsh medaldi enshileýge talpynbaq
ASTANA. 3 maýsym. QazAqparat - Bıylǵy jyldyń basty oqıǵasy Londonda ótetin HHH jazǵy Olımpıadasy oıyndarynyń bastalýyna 53 kún qaldy.
«QazAqparat» agenttigi dástúrli túrde aptanyń ár jeksenbisinde osy aıtýly sporttyq sharada Qazaqstannyń namysyn qorǵaıtyn sportshylardy tanystyrýdy jalǵastyrady. Osy joly biz oqyrman qaýymyn Olımpıada oıyndarynda grek-rım kúresinen elimizdiń namysyn qorǵaıtyn balýandarymyzben tanystyrmaqpyz.
Klassıkalyq kúres Ejelgi Grekııada paıda bolyp, Rım ımperııasy tusynda barynsha damysa, grek-rım kúresiniń qazirgi túri XIX ǵasyrdyń alǵashqy jartysynda Frantsııada qalyptasqan. Al 1896 jyldan Olımpıada oıyndarynyń baǵdarlamasyna engizilgen. Bul sport túrinen álem chempıonaty 1904 jyldan, Eýropa chempıonaty 1898 jyldan bastap ótkizilip keledi. Halyqaralyq kúres federatsııasynyń negizi 1912 jyly qalanǵan.
Osy sport túriniń 60 keli salmaq sanatynda tumandy Albıon eliniń boz kilemine Almat Kebisbaev shyǵady. 1987 jyldyń 12 jeltoqsanynda Shyǵys Qazaqstan oblysynyń Urjar aýdanynda dúnıege kelgen bul balýanymyz qazirgi ýaqytta elorda atynan óner kórsetedi. Ol Qazaqstannyń birneshe márte chempıony, Azııa chempıonatynyń kúmis júldegeri, jeńimpazy, Ivan Poddýbnyı atyndaǵy Gran-prıdiń chempıony, Máskeýde ótken álem chempıonatynyń kúmis, Ystambulda ótken álem chempıonatynyń qola júldegeri. Qazaqstannyń eńbek sińirgen sport sheberi.
66 kelide Shyǵys Qazaqstan oblysy Urjar aýdanynyń taǵy bir ókili Darhan Baıahmetov beldesýge shyǵady. 1985 jyly dúnıege kelgen Darhan Azııa chempıony, Vengrııada ótken Gran-prıdiń jeńimpazy, Qazaqstannyń birneshe márte chempıony. Ol elordada ótken Azııalyq lıtsenzııalyq týrnırde Qazaqstan quramasynyń qorjynyna altyn medal salǵan bolatyn.
74 kelide boz kilemge beldesýge shyǵatyn balýanymyz Ashat Dilmuhamedov 1987 jyly dúnıege kelgen. Dáýlet Turlyhanovtyń kúres mektebinde jattyǵady. Ol 2011 jyly Ystambulda ótken álem chempıonatynda besinshi orynǵa taban tirep, London olımpıadasynyń lıtsenzııasyn enshilegen bolatyn.
Al 84 keli salmaq sanatynda el namysyn qorǵaıtyn Danııal Gadjıev Batys Qazaqstan oblysynyń ortalyǵy Oral qalasynda týǵan. Ol da Dáýlet Turlyhanovtyń kúres mektebinde jattyǵady. London lıtsenzııasyn elordada ótken azııalyq týrnırde utyp alǵan bolatyn.
120 keli salmaq sanatynda Nurmahan Tynalıev el namysyn qorǵaıdy. Jambyl oblysynyń Shý aýdanynda dúnıege kelgen ol álem chempıonatynyń eki dúrkin júldegeri. Máskeý jáne Ystambulda ótken álem chempıonattarynda qola júldeni qanjylaǵan. Gýanchjoýda ótken Azııa oıyndarynda chempıon atanǵan.
"Olmımpıada oıyndaryna ǵalamshardyń eń úzdik sportshylary barady. Sondyqtan da kez kelgen sportshyny baǵalamaý aǵattyq. Biz barlyq sportshylarymyzdan da úzdik nátıjeler kútemiz. Josparymyzda keminde úsh olımpıada medalin enshileý bar. Baıraqty básekede el namysyn qorǵaıtyn sportshylardyń eshqaısysyn da bóle jara aıta almaımyn. Óıtkeni árbir sportshymyz bizdiń eń basty úmitimiz" - deıdi QR grek-rım kúresinen ulttyq quramasynyń bas jattyqtyrýshysy Muratbek Qasymhanov.
