Qazaq balýandary V Dúnıejúzilik kóshpendiler oıyndaryn qorytyndylady

ASTANA. KAZINFORM – Elordadaǵy Qazmedıa ortalyǵynda V Dúnıejúzilik kóshpendiler oıyndaryndaǵy qazaq kúresi boıynsha qorytyndy baspasóz konferentsııasy ótti. 

Konferentsııaǵa Italııa Assotsıatsııalanǵan stılder federatsııasynyń prezıdenti Djordjıo Vıttorıo, Qazaq Kuresi Assotsıatsııasynyń bas dırektory Damır Bekbosynov, Qazaqstannyń qazaq kúresi ulttyq quramasynyń bas bapkeri Ǵanı Keldiqulov jáne 60 kelige deıingi salmaq dárejesiniń jeńimpazy Meıirjan Bereketov qatysty. Kezdesý barysynda túrli jarystyń nátıjeleri talqylanyp, qazaqstandyq sportshylardyń jetistikteri atalyp ótti. 

«Qazaqstandyq balýandar V Dúnıejúzilik kóshpendiler oıyndarynda 15 medal jeńip aldy. Onyń 12-si altyn, 1-eýi kúmis jáne 2-eýi qola. Bul jetistik qazaqstandyq balýandardyń álemdik arenadaǵy abyroıyn, mereıin asqaqtata túsedi», - dedi Qazaq kúresinen ulttyq quramanyń bas bapkeri Ǵanı Keldiqulov.

Aıta keteıik, qazaq kúresi V Dúnıejúzilik kóshpendiler oıyndaryndaǵy qatysýshy eń kóp tirkelgen sport túri atandy. Eki kúnge sozylǵan jarysqa 41 elden kelgen 274 sportshy qatysyp, 16 salmaq dárejesinde medaldar jıyntyǵyn sarapqa saldy. Jarys Jaqsylyq Úshkempirov atyndaǵy sport kesheninde ótti.