Qazaq balýandar London tórinde Olımpıada júldesi úshin jarys joldaryn bastaıdy
ASTANA. 5 tamyz. QazAqparat - 2011 jylǵy Azııa chempıonatynyń qola júldegeri grek-rım kúresiniń sheberi Ashat Dilmuhamedov búgin London Jlımpıadasynda boz kilemge shyǵady.
74 keli salmaq sanatynda beldesetin balýanymyzdyń alǵashqy aınalymdaǵy qarsylasy 2010 jylǵy Eýropa chempıony belarýs Aleksandr Kıkınov. Ashat Dilmuhamedov 1987 jyly dúnıege kelgen. Dáýlet Turlyhanovtyń kúres mektebinde jattyǵady. Ol 2011 jyly Ystambulda ótken álem chempıonatynda besinshi orynǵa taban tirep, London olımpıadasynyń lıtsenzııasyn enshilegen bolatyn.
Al erteń úsh balýanymyz boz kilemde beldesetin bolady. Olar: Almat Kebisbaev, Danııal Gadjıev, Nurmahan Tinálıev. 60 keli salmaq sanatynda tumandy Albıon eliniń boz kilemine Almat Kebisbaev shyǵady. 1987 jyldyń 12 jeltoqsanynda Shyǵys Qazaqstan oblysynyń Urjar aýdanynda dúnıege kelgen bul balýanymyz qazirgi ýaqytta elorda atynan óner kórsetedi. Ol Qazaqstannyń birneshe márte chempıony, Azııa chempıonatynyń kúmis júldegeri, jeńimpazy, Ivan Poddýbnyı atyndaǵy Gran-prıdiń chempıony, Máskeýde ótken álem chempıonatynyń kúmis, Ystambulda ótken álem chempıonatynyń qola júldegeri. Qazaqstannyń eńbek sińirgen sport sheberi. Al 84 keli salmaq sanatynda el namysyn qorǵaıtyn Danııal Gadjıev Batys Qazaqstan oblysynyń ortalyǵy Oral qalasynda týǵan. Ol da Dáýlet Turlyhanovtyń kúres mektebinde jattyǵady. London lıtsenzııasyn elordada ótken azııalyq týrnırde utyp alǵan bolatyn. 120 keli salmaq sanatynda Nurmahan Tinálıev el namysyn qorǵaıdy. Jambyl oblysynyń Shý aýdanynda dúnıege kelgen ol álem chempıonatynyń eki dúrkin júldegeri. Máskeý jáne Ystambulda ótken álem chempıonattarynda qola júldeni qanjyǵalaǵan. Gýanchjoýda ótken Azııa oıyndarynda chempıon atanǵan.
7 tamyzda 66 kelide Darhan Baıahmetov beldesýge shyǵady. 1985 jyly dúnıege kelgen Darhan Azııa chempıony, Vengrııada ótken Gran-prıdiń jeńimpazy, Qazaqstannyń birneshe márte chempıony. Ol elordada ótken Azııalyq lıtsenzııalyq týrnırde Qazaqstan quramasynyń qorjynyna altyn medal salǵan bolatyn.
8 tamyzda beldesýge qyzdarymyz Juldyz Eshimova (48 kg) men Elena Shalygına (63 kg), al 9 tamyzda - Gýzel Manıýrova (72 kg) shyǵady.
Al erkin kúres sheberleriniń boz kilemdegi jan alyp, jan berisken beldesýleri 10 tamyzda bastalady. Osy kúni Dáýlet Nııazbekov (55 kg) pen Abdýlhákim Shapıev (74 kg) óz baqtaryn synasa, kelesi kúni Ermek Baıdýashev (84 kg) pen Dáýlet Shabanbaı (120 kg) Olımpıada júldesi úshin bedesedi. Al 12 tamyzda Aqjúrek Tańatarov (66 kg) pe Taımýraz Tıgıev (96 kg) boz kilemde aıqasady.
Búgin Londondaǵy balýandar beldesýi Astana ýaqyty boıynsha 18:00-de bastalady. Al júldeli oryndar úshin aıqastar tún ortasyna qaraı ótedi. «Habar» arnasynyń tikeleı kórsetilimderi saǵat 22:45-te bastalyp, 01:15-ke deıin jalǵasady.
