Qazaq baleti London tórinde óner kórsetti
LONDON. QazAqparat - Londonda Abaı atyndaǵy Qazaq memlekettik opera jáne balet akademııalyq teatry tuńǵysh ret óner kórsetti. Kontsert ótken «Kolızeı» kontserttikzalynda ıne shanshar oryn bolmady, dep habarlaıdy QazAqparat tilshisi.
Teatr kópshilik nazaryna «Shopenıana» jáne «Sheherezada» atty bir aktili klassıkalyq shyǵarmalardy usyndy,. Óner ujymynyń gastroli Qazaqstannyń Ulybrıtanııadaǵy elshiliginiń jáne QR Mádenıet jáne sport mınıstrliginiń qoldaýymen Jastar jyly jáne «Rýhanı jańǵyrý» baǵdarlamasy aıasynda uıymdastyryldy. Eki myńnan astam kórermenniń qatarynda brıtanııalyq saıası jáne bıznes-ısteblıshment, dıplomatııalyq korpýs ókilderi jáne bedeldi ónertanýshylar bar. Olar qazaqstandyq bıshilerdiń sheberligin joǵary baǵalady. «Men ómirimde birinshi ret qazaq baletin kórip, óte erekshe áserge bólendim. Bıdiń joǵary standarty jáne oryndaýshylardyń kásibıligi tańdaı qaqtyrdy. Bul shynymen de keremet demalys ári tosyn syı boldy»,– dedi qonaqtardyń biri Sara Meıdan.Taǵy bir meıman Lýıs Rodrıges de la Serra: «Bári ádemi boldy, qoıylym tamasha ótti. Qazaq baleti óte kórkem, maǵan tehnıkadan bastap bári unady! Kontserttiń keremet ótýimen quttyqtaımyn!», dedi.Aıta ketý kerek, «Sheherezadany» «Kolızeı» qonaqtary úshin ıtalııalyq horeograf Tonı Kandeloro jańasha árlegen. Avtor- Tsıýrıh operasy, Kýba Ulttyq baletinde jáne parıjdik «Shatle» teatrynda shyńdalyp, álemge tanylǵan óner juldyzy.«Shopenıana» men «Sheherazadanyń» basty rólderin Abaı atyndaǵy Qazaq memlekettik opera jáne balet akademııalyq teatrynyń jetekshi solısteri Janel Tókeeva, Málıka Elshibaeva, Arısa Hasımoto, Raqym Daırov, Dınara Esentaeva jáne Azamat Asqarovtar somdady.
