Qazaq balerınasy ónerimen London kórermenderin tamsandyrdy
ASTANA. QazAqparat - «Astana Opera» teatrynyń solısti Áıgerim Beketaeva Peterbor akademııalyq teatrymen birlesip, Londonda óner kórsetti.
Ol «Roden» qoıylymynda basty keıipkerdi somdap, kópshiliktiń yqylasyna bólendi. Teatr jetekshisi Borıs Eıfman basty róldi oryndaıtyn ártisti syrttan alǵash ret shaqyryp otyr, dep habarlaıdy khabar.kz.
«Qazaq baletin súıer qaýym men «Astana Opera» basshylyǵy maǵan kórsetken qurmetine, syı-syıapatyna jaýap retinde men Áıgerimdi shaqyrdym. Ol aıryqsha daryn ıesi, názik bolǵanymen, óte jigerli», - deıdi horeograf Borıs Eıfman.
«Roden» baleti - Eıfman teatrynyń repertýaryndaǵy jańa qoıylymdardyń biri. Kórkem shyǵarmada uly músinshi Ogıýst Roden men onyń jas shákirti Kamılla Klodeldiń qaıǵyly ómiri baıandalady. Shynaıy sezimdi kózi qaraqty kórermenge jetkizýde bas keıipkerlerge artylatyn júk aýyr. «Astana Opera» bıshisi Áıgerim Beketaeva ózine artylǵan mindetti abyroımen alyp shyǵyp, kórermenniń ystyq yqylasyna bólendi.
«Men baqyttymyn. Bar ónerimdi salyp bıleýge tyrystym. Borıs Eıfmannyń teatry quramynda, London sahnasyna shyqqanyma óte qýanyshtymyn. Men úshin bul úlken qurmet, ólsheýsiz tájirıbe men mansap», - deıdi «Astana Opera» teatrynyń balerınasy Áıgerim Beketaeva.
«Óte keremet balerına. Qozǵalys plastıkasy erekshe. Qýanysh pen qaıǵyny, esten adastyratyn mahabbat sezimin bı arqyly jetkize bilý - úlken óner. Sahnadaǵy ústemdigi sózsiz. Qazaq baletiniń ókili osyndaı bolsa, onyń bolashaǵy zor ekeni shúbásiz», - dep jyly lebizin bildirdi londondyq kórermenderdiń biri Endrıý Farmer.
Aıta keteıik, bul balet Nıý-Iork, Parıj, Máskeý, Býdapesh qalalarynda úlken jetistikpen qoıylǵan edi. Áıgerim «osyndaı qoıylymdarǵa qatysý tájirıbe jınaqtap qana qoımaı, odan da úlken belesterge umtylýǵa jol ashady», deıdi. Endi ol Reseıdiń belgili horeografy ıÝrıı Grıgorovıchtiń osy maýsym aıyna belgilengen «Spartak» spektaklindegi róline daıyndalmaq.
