Qazaq balasy eki jyl qatarynan IMO altyn medalin jeńip aldy

Atalmysh mekteptiń úsh oqýshysy Qazaqstan quramasynda Taılandta ótken Halyqaralyq matematıka olımpıadasyna (IMO) attanyp ketken bolatyn. Ótken jyly osy olımpıadanyń altynyn jeńip alǵan Ahan Ismaılov bıyl ekinshi ret jeńisin qaıtalap, eki dúrkin chempıon atandy.

Asa bedeldi osynaý olımpıadada eki jyl qatarynan altyn alǵan qazaq balasy buryn bolmaǵan. Jáne osy mekteptiń oqýshysy Oljas Qady­rakýnov kúmis medal, al Alen Abdrah­manov qola medalmen marapattaldy, dep jazady «Egemen Qazaqstan».

Onyń aldynda bıylǵy 5-12 shil­de aralyǵynda Úndistanda 86 el­den 382 oqýshy qatysqan 46-shy Ha­lyqaralyq fızıka olımpıadasy (IPhO) ótken bolatyn. Sol jarysta Qazaqstan komandasy bir altyn jáne bir qola medal jeńip alsa, altyn me­daldi Respýblıkalyq fızıka-mate­matıka mektebiniń (RFMM) oqý­shy­sy Dáýlet Qurmantaev ıelenip edi. Al 4-16 shilde aralyǵynda Taı­landta ótken 56-shy Halyqaralyq matematıkalyq olımpıadasyna (IMO) álemniń 104 elinen 600-ge jýyq oqýshy qatysqan. Qazaqstan koman­dasy 1 altyn, 1 kúmis jáne 2 qola - barlyǵy tórt medaldi jeńip alyp, Qazaq­stan komandasy álemdik bilim doda­synda 25-shi orynǵa turaq­tady. Nátıjesinde daryndy qazaq balalary álemniń aldyńǵy qatarly ýnıversıtetterine shaqyrylyp, bilim granttaryn jeńip alǵan.

Endi Ahan Ismaılov Gonkong Ǵylym jáne tehnologııa ýnıversıtetine, Oljas Qadyrakýnov Ońtústik Koreıadaǵy eń úzdik ýnıversıtet sanalatyn Seýl Ǵylym jáne tehnologııa ýnıversıtetine qabyldanǵan.

Sol sııaqty búgingi kúnderi, ıaǵnı 20-29 shilde aralyǵynda Ázerbaıjanda hımııa páninen 47-shi Halyqaralyq olımpıada (IChO) ótýde. Qazaqstan komandasynyń quramynda RFMM-nyń10-synyp oqýshysy Arnur Makenov bar. Óz rekordyn ózi jańartyp otyratyn mekteptiń sońǵy 10 jylda 6 túlegi AQSh-taǵy Massachýsets teh­nologııalyq ınstıtýtyna óz kúshterimen qabyldanǵan.

Osylaısha Respýblıkalyq fızıka-matematıka mektep-ınternaty túlekteri álemdegi eń jetekshi oqý oryndaryna túsken elimizdegi birden bir kóshbasshy mektep bolyp tur.

Sol sııaqty «Fızmattyń» Eset Júsipov pen Nıdjat Djavadov deıtin eki shákirti INTEL ISEF-te, ıaǵnı Dúnıejúzilik oqýshylardyń ǵylymı jáne ınjenerlik jetistik­teriniń jarysynda tórtinshi oryn alǵan. AQSh-ta ótken bul baıqaý­ǵa bıyl 77 memleketten 1658 oqýshy qatysyp, oǵan Nobel syıly­ǵynyń laýreattary men jetekshi ýnıversıtetterdiń professorlary qazylyq etkenin, júlde qory 4 mıllıon AQSh dollary ekenin eskersek, onda bul tabystyń orny kórinedi. Qysqasy, dúnıejúzi boıynsha bul jarysta 16 eldiń ǵana oqýshylary medal alyp keledi. Al «Fızmat» oqýshylary bes jyldan beri júldege iligip, ekinshi jyl qata­rynan ekinshi oryndy ustap tur.