Qazaq balasy djıý-djıtsýdan álem chempıony atandy
ASTANA. QazAqparat - Qaraǵandylyq Nurjan Seıdýáli djıý-djıtsýdan álem chempıony atandy, dep habarlaıdy óńirlik ákimdiktiń baspasóz qyzmeti.
Qazaqstandyq sportshylar djıý-djıtsý boıynsha álem chempıonatynda bir altyn, eki kúmis jáne tórt qola medal utyp aldy. Jalǵyz altyn júldeni el quramasynyń qorjynyna qaraǵandylyq Nurjan Seıdýáli saldy.
Saıys Bogota qalasynda (Kolýmbııa) ótti. Oǵan 36 elden 350 sportshy qatysty. Qaraǵandylyq djıý-djıtsý mektebiniń tálimgeri Nurjan Seıdýáli 56 kılogrammǵa deıingi salmaqta bas synasty.
Jerlesimiz úsh ret jekpe-jekke shyqqan. Birinshisinde ol kanadalyq qarsylasyn 5:0 esebimen jeńdi. Jartylaı fınalda Nurjan Izraılden kelgen sportshymen beldesip, qylqyndyrý ádisi arqyly tize búktirdi. Aqtyq saıysta ol Belgııadan kelgen qarsylasyn da san soqtyrdy.
Qazaqstan Álem chempıonatynda jalpykomandalyq úshinshi oryndy ıelendi.
