Qazaq balasynyń ósýi men tabıǵattyń úılesimi týraly qytaılyq fılm prokatqa shyǵady — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Buharada Qazaqstan–Ózbekstan parlamentaralyq keńesiniń otyrysy ótti — ÓzA
Buhara qalasynda Ózbekstan Respýblıkasy Olıı Majlıs Zań shyǵarýshy palatasy men Qazaqstan Respýblıkasy Parlamenti Májilisi arasyndaǵy Parlamentaralyq yntymaqtastyq keńesiniń kezekti otyrysy ótti.
Bul týraly osy aptada «ÓzA» aqparat agenttigi habarlady.
Habarlamada aıtylýynsha, jıynda taraptar ótken jyly Almaty qalasynda ótken kezdesýden keıingi atqarylǵan jumystardy qorytyndylap, eki el arasyndaǵy saıası jáne ekonomıkalyq yntymaqtastyqty nyǵaıtý máselelerin talqylady.
Kezdesý barysynda saýda-ekonomıkalyq baılanystar, aýyl sharýashylyǵy, tsıfrlandyrý, mádenı-gýmanıtarlyq jáne týrızm salalaryndaǵy áriptestikti damytý baǵyttaryna erekshe nazar aýdaryldy.
Otyrys qorytyndysynda taraptar memleketter basshylary deńgeıinde qol jetkizilgen kelisimderdiń oryndalýyn qamtamasyz etý úshin parlamenttik baqylaýdy kúsheıtýge kelisti.
Iran Ormuz buǵazynda Qytaı ıýaniniń ornyna rıal alýǵa múddeli — Eurasia Today
Irannyń Syrtqy ister mınıstrligine qarasty ekonomıkalyq máseleler jónindegi burynǵy orynbasar Mehdı Safarı Ormýz buǵazy arqyly ótetin kemelerden alynatyn alymdardy esepteý valıýtasyn ózgertý qajettigin aıtty. Onyń pikirinshe, bul baǵytta Qytaı ıýanin qoldaný emes, Iran rıalyn engizý tıimdi bolmaq, dep habarlaıdy Eurasia Today aqparat agentti.
Atalǵan aqparat agenttiginiń dereginshe, Safarı qazirgi geoekonomıkalyq jáne qaýipsizdik jaǵdaılaryna toqtalyp, strategııalyq teńiz ótkelderinde ulttyq valıýtany qoldaný tájirıbesin keńeıtýdi usyndy. Ol bul tásil syrtqy valıýtalarǵa táýeldilikti azaıtýǵa múmkindik beretinin atap ótti.
Buǵan deıin Reseıdiń tabıǵı gazdy rýblmen satý tájirıbesin mysalǵa alǵan ol, Ormýz buǵazynan ótetin kemeler de alymdy rıalmen tóleýi tıis ekenin jetkizdi. Onyń aıtýynsha, kemeler aldyn ala rıal satyp alyp, sol valıýtamen esep aıyrysa alady.
Sarapshy mundaı qadam Iran rıalynyń halyqaralyq deńgeıdegi rólin kúsheıtip, eldiń ekonomıkalyq egemendigin arttyrýǵa yqpal etetinin aıtady. Sonymen qatar, bul bastama «petrorıal» tujyrymdamasyn júzege asyrýǵa jol ashýy múmkin ekeni de atap ótildi.
Sondaı-aq osy aptada Eurasia Today basylymynda «Qazaqstan on mıllıon tonnaǵa jýyq astyq pen un eksporttady» degen taqyryptaǵy aqparat jaryq kórdi.
2025 jyldyń qyrkúıegi men 2026 jyldyń naýryzy aralyǵynda Qazaqstannan astyq pen un eksporty (astyq balamasynda) 9,9 mln tonnany qurady. Bul kórsetkish ótken jyldyń sáıkes kezeńimen salystyrǵanda (8,7 mln tonna) aıtarlyqtaı ósim kórsetip otyr.
«Qazaqstan temir joly» AQ málimetinshe, eksport kóleminiń artýy syrtqy naryqtardaǵy qazaqstandyq aýyl sharýashylyǵy ónimderine degen turaqty suranystyń saqtalǵanyn bildiredi.
Negizgi baǵyttar boıynsha jetkizilimderde ósim baıqaldy. Atap aıtqanda, Ózbekstanǵa eksport 15 paıyzǵa artyp, 8,4 mln tonnaǵa jetse, Qyrǵyzstan baǵytyna jetkizilim 1,7 esege ósip, 393 myń tonnaǵa jetti. Sondaı-aq Aýǵanstan men Túrikmenstan baǵyttarynda da aıtarlyqtaı ósim tirkeldi.
Jalpy alǵanda, Qazaqstan álemdegi jetekshi astyq eksporttaýshylardyń biri bolyp qala beredi. Eksport geografııasynyń keńeıýi men logıstıkalyq múmkindikterdiń jaqsarýy syrtqy saýda kóleminiń artýyna yqpal etip otyr.
Qazaq balasynyń ósýi men tabıǵattyń úılesimi týraly fılm prokatqa shyǵady — «Halyq gazeti»
Qytaılyq rejısser Tszın I túsirgen «Botanık» fılmi 14 sáýirde Qytaı kınoteatrlarynda kórsetilimge shyǵady, dep jazady «Halyq gazeti».
Qytaılyq BAQ-tyń málimetinshe, týyndy Qytaıdyń Shyńjań óńiriniń soltústigindegi shekaralyq aýylda ómir súretin qazaq balasynyń ósý jolyn baıandaıdy. Fılmde keıipker tabıǵattaǵy ósimdikterdiń ósip-ónýi men solýy arqyly ómirdiń mánin, qoshtasý men tamyr tartýdy túsinedi.
Rejısserdiń aıtýynsha, kartına qazaq halqynyń jylqy, búrkit jáne ózge de jan-janýarlardy kıeli sanaýymen astasyp, tabıǵattyń adam bolmysy men dúnıetanymyna áserin ashyp kórsetýge baǵyttalǵan. Bul — Tszın Idiń alǵashqy tolyqmetrajdy fılmi.
Fılm halyqaralyq deńgeıde birqatar marapattarǵa ıe boldy. Atap aıtqanda, Berlın halyqaralyq kınofestıvali aıasynda «Jańa býyn balalar» baıqaýynda úzdik tolyqmetrajdy fılm atansa, Kaır halyqaralyq kınofestıvali kezinde arnaıy atalym men NETPAC syılyǵyn jeńip aldy.
Sondaı-aq Sıangan halyqaralyq kınofestıvali barysynda Tszın I «Jańa býyn» sektsııasynda úzdik rejısser dep tanyldy. Al basty róldi somdaǵan Esil Jaqsylyquly Beıjiń halyqaralyq kınofestıvali sheńberinde «Nurly bolashaq» sektsııasynda úzdik akter atandy.
Sonymen qatar osy aptada «Halyq gazeti» basylymynda «Shyńjań men Almaty oblysy jylqy sharýashylyǵy boıynsha kelisimge qol qoıdy» degen taqyryptaǵy aqparat jaryq kórdi.
Atalǵan BAQ-tyń dereginshe, Qytaıdyń Shyńjań jylqy sharýashylyǵy qaýymdastyǵy men Almaty oblysy arasynda yntymaqtastyq týraly kelisimge qol qoıyldy.
Qujat aıasynda taraptar jylqy tuqymyn tirkeý, at jarystaryn uıymdastyrý, mádenıet pen týrızmdi ushtastyrý, sondaı-aq salalyq ózara baılanysty damytý baǵyttarynda birlesip jumys isteıdi.
Kelisimge sáıkes, eki tarap asyl tuqymdy jylqylar men sapaly aıǵyrlar almasýdy josparlap otyr. Bul bastama óńirlerdegi jylqy tuqymyn jaqsartýǵa jáne salanyń damýyna serpin bermek.
Sonymen qatar, taraptar ózara saparlar uıymdastyrý jóninde ýaǵdalasty. Bıyl shilde aıynda qazaqstandyq delegatsııa Shyńjańǵa baryp, kókpar jarysyna qatysyp, salalyq kelissózder júrgizedi.
— Sońǵy jyldary Shyńjań óńiri men Ortalyq Azııa elderi arasynda at sporty baǵytyndaǵy yntymaqtastyq jandana túsken. Atap aıtqanda, 2025 jyly Shyńjańnyń Mońǵulkúre aýdany «Jibek joly — Dostyq kýbogy» kókpar jarysy ótken. Sondaı-aq, 2026 jyldyń naýryz aıynda Shyńjań qaýymdastyǵynyń kókpar komandasy Ózbekistanǵa baryp, halyqaralyq jarystarǵa qatysty, dep dep jazady qytaılyq BAQ.
Sonymen qatar osy aptada Halyq gazetinde «Ortalyq Azııadan kelgen zyǵyr tuqymy Inchýanǵa jetkizildi» degen taqyryptaǵy aqparat jarııalandy.
Qytaılyq BAQ-tyń dereginshe, quny 8,5 mıllıon ıýanǵa baǵalanǵan zyǵyr tuqymy tıelgen poıyz Qazaqstandaǵy Jańa esil stantsııasynan jóneltilgen. Shyńjańdaǵy Qorǵas porty arqyly elge kirgen soń, bir aıaldamada kedendik rásimdi aıaqtap, tolyǵymen standarttalǵan konteınerlerde tasymaldanǵan júk tikeleı Inchýanǵa jóneltildi.
Bul ónimderdiń kelýi Inchýannyń Qytaıdyń soltústik-batysynda zyǵyr tuqymyn saqtaý, óńdeý jáne taratý boıynsha aımaqtyq hab retindegi rólin arttyryp, halyqaralyq logıstıkaǵa óz qoldaýyn kórsetti.
AQSh pen Irannyń kelisiminen keıin munaı baǵasy tómendep, aktsııalar artty — TRT
AQSh pen Iran arasyndaǵy kelisim aıasynda Ormýz buǵazy arqyly munaı men gaz tasymalyn ýaqytsha qaýipsiz túrde qaıta jandandyrýǵa baǵyttalǵan eki aptalyq bitim jasaldy. Bul sheshim jahandyq energetıkalyq naryqtaǵy shıelenisti azaıtyp, ınvestorlar kóńil-kúıine oń áser etti, dep jazady Túrkııa Radıo Televızııa portaly.
Atalǵan BAQ-tyń keltirgen málimetterine súıensek, AQSh prezıdenti Donald Tramp Iranǵa qarsy áskerı áreketterdi eki aptaǵa toqtatý týraly sheshim qabyldaǵanyn málimdedi. Onyń aıtýynsha, osy ýaqyt ishinde taraptar uzaq merzimdi beıbit kelisimge kelý múmkindigin qarastyrady jáne Ormýz buǵazynyń tolyq ári qaýipsiz ashylýy qamtamasyz etilýi tıis.
Iran tarapy álemdik munaı men gazdyń eleýli bóligi ótetin Ormýz buǵazy arqyly halyqaralyq tasymaldyń qaýipsiz ótýine kelisim bergenin habarlady. Bul qadam aımaqtaǵy geosaıası jaǵdaıdy ýaqytsha turaqtandyrýǵa múmkindik berdi.
Kelisim jarııalanǵannan keıin munaı baǵasy aıtarlyqtaı tómendedi: Brent shamamen 16 paıyzǵa, West Texas Intermediate 20 paıyzǵa arzandady. Energııa jetkizilimine qatysty qaýiptiń azaıýy naryqqa tikeleı áser etti.
Álemdik qor jáne valıýta naryqtarynda ósim baıqaldy. Azııa bırjalary 2–6 paıyz aralyǵynda kóterilip, dollar álsirese, eýro men ıen nyǵaıdy. Altyn men bıtkoın baǵasy da qalpyna kele bastady.
Qytaıda ishki áýe reısterinde bılet baǵasy qymbattaıdy — Altaı aqparaty
Qytaıdyń birqatar áýe kompanııalary 2026 jylǵy 5 sáýirden bastap ishki baǵyttar boıynsha otynǵa qosymsha aqy mólsherin jańartty, dep habarlaıdy Qytaıdyń Altaı aqparaty portaly.
Atalǵan basylymnyń dereginshe, jańa erejege sáıkes, qashyqtyǵy 800 shaqyrymǵa deıingi baǵyttar úshin ár reıs segmentine 60 ıýan, al 800 shaqyrymnan asatyn baǵyttar úshin 120 ıýan kóleminde qosymsha aqy alynady.
Náresteler bul tólemnen tolyq bosatylady. Al balalarǵa, múgedek ardagerlerge jáne qyzmet babynda múgedek bolǵan polıtsııa qyzmetkerlerine 50 paıyz jeńildik qarastyrylǵan. Osyǵan sáıkes, 800 shaqyrymǵa deıingi reısterde qosymsha aqy 30 ıýan, al 800 shaqyrymnan asatyn baǵyttarda 60 ıýan bolady.
Sonymen qatar, 2026 jylǵy 4 sáýirge deıin satyp alynǵan bıletterge ózgeris engizilgen jaǵdaıda, buryn tólengen otyn qosymsha aqysy qaıta eseptelmeıdi.
Halyqaralyq baǵyttar boıynsha qosymsha aqy kólemi áýe kompanııalarynyń júıelik esepteýlerine sáıkes anyqtalady.
