Qazaq balalarymen asyq oınap óskennen keıin meniń qazaq tilin bilmeýime haqym joq - A.Vereşok
ASTANA. Qyrkúıektiń 21-i. QazAqparat /Arman Asqarov/ - Men qazaq tilin bilgenim úshin týǵan jerim Pavlodar oblysy Baıanaýylǵa qaryzdarmyn. Búgin Lev Gýmılev atyndaǵy Eýrazııa ulttyq ýnıversıtetinde Tilder merekesi aıasynda ótken «Tilge qurmet - elge qurmet» saltanatty is-sharasy barysynda jýrnalısterge suhbat bergen Qazaqstan halqy assambleıasynyń múshesi Aleksandr Vereşok osylaı aıtty, dep habarlaıdy QazAqparat.
«Men qazaq tilin bilgenim úshin týǵan jerim Pavlodar oblysy Baıanaýylǵa qaryzdarmyn. Qazaq aýylynda, qazaq balalarymen asyq oınap óskennen keıin meniń qazaq tilin bilmeýime haqym joq edi. Bizde orys-qazaq dep bóliný bolǵan joq. Bárimiz úı-úı bop, aralasyp tatý tátti januıa bolyp turdyq. Birinshi synypqa qazaq mektebine barǵannan bastap meniń qazaq ónerine qushtarlyǵym oıandy. Onyń ishinde dombyramen án aıtýǵa qumarym basym boldy. Kóp jyldardan beri qazaqtyń ónerin, sonyń ishinde tilin, mádenıet nasıhattaýmen kelem. Ózim qazaǵymnyń 40-tan astam ánderin, 20-dan astam termesin bilemin, kópshilik aldynda oryndap ta júrmin. Negizi, terme halyqtyń júreginen shyǵady dep bilemin. Sondyqtan osy shyǵarmalardy júregimmen súıip, tebirene oryndaımyn», - deıdi A.Vereşok.
Ýnıversıtet alańynda ótetin is-shara barysynda qazaqtyń kıiz úıleri tigilip, árbir úıde merekelik dastarhan jaıylady. Osy jerde ornatylatyn arnaıy sahnada «Dala sazy» orkestriniń súımeldeýimen «Qara jorǵa» bıi oryndalyp, qazaqtyń ónerpaz jastary maqal-mátel jáne til saıystarynda, sondaı-aq asyq pen toǵyzqumalaq sııaqty ulttyq oıyndarda óz baqtaryn synady.
