Qazaq balalary daryndylyq jaǵynan álemde 12-orynda

ASTANA. QazAqparat - Qazaqstan Respýblıkasynyń búldirshinderi daryndylyq jaǵynan álemniń 100 eli arasynda 12-oryn ıelendi.

Bul týraly búgin Táýelsizdiktiń 25 jyldyǵyna arnalǵan balalar forýmynda QR Memlekettik hatshysy Gúlshara Ábdiqalyqova málim etti, dep habarlaıdy QazAqparat.

 

«Bıyl 1200 bala halyqaralyq jarystarda júldeli oryndarǵa ıe boldy. Jalpy, daryn jaǵynan Qazaqstannyń balalary 100 el ishinde 12-oryndy ıelenip otyr. 20 jyl buryn bul kórsetkish 50-shi oryn edi. Biz qazir Qazaqstandy damyǵan 30 eldiń qataryna qosamyz dep júrmiz ǵoı, al balalarymyz óz bilimderimen ol mejege jetip qoıdy», - dedi G.Ábdiqalyqova.

 

Jalpy, búgin jańa Oqýshylar saraıynda ótken balalar forýmyna Qazaqstannyń túpkir-túpkirinen 336 bala kelgen. Endi bul forým dástúrge aınalyp, jyl saıyn oqý men ónerde úzdik dep tanylǵan balalar Astanaǵa jınalyp otyrady.