Qazaq balalary IBO 2024 olımpıadasynda 100% nátıje kórsetti
ASTANA. KAZINFORM — Astanada bıologııadan oqýshylar arasyndaǵy eń bedeldi halyqaralyq olımpıada IBO-2024 óz máresine jetti.
Birinshi ret IBO osydan 34 jyl buryn alty eldiń qatysýymen ótken bolatyn.
Bıyl Qazaqstanda ótken olımpıadaǵa 81 memleketten komandalar jınaldy. Búgin olımpıadanyń resmı jabylý saltanaty ótti.
Oqý-aǵartý mınıstri Ǵanı Beısembaev barlyq qatysýshylarǵa jáne halyqaralyq uıymdastyrý komıtetine alǵysyn bildirdi.
Ol olımpıadanyń jalpy bilim salasynyń damýy úshin qanshalyqty mańyzdy ekenin atap ótti.
«IBO-2024 — bilimniń básekelestik alańy ǵana emes, ol ǵylym salasynda memleketterdiń dostyǵy men yntymaqtastyǵyn tereńdetýge yqpal etetin halyqaralyq mańyzdy shara. Qazaqstanda ótkizgen árbir kún Sizderge jarqyn estelik syılap, aldaǵy ýaqytta ǵylymnyń jańa bıik belesterin baǵyndyrýǵa shabyt beredi dep oılaımyn. Bolashaqta Sizder orasan zor ǵylymı jańalyqtar ashyp, álemniń uly ǵalymdarynyń dańqty jolyn jalǵastyrasyzdar dep senemin!» — dedi Ǵanı Beısembaev.
Atap ótý kerek, olımpıada qorytyndysy boıynsha Halyqaralyq komıtettiń ınpektorlary men ádil qazylar IBO-2024 olımpıadasynyń uıymdastyrylýyna joǵary baǵa berdi, sondaı-aq qazaqstandyq jas ǵalymdar ázirlegen olımpıada tapsyrmalarynyń ózektiligi men ózgesheligin atap kórsetti.
Bul olımpıadany ótkizý úshin tynbaı eńbek etken uıymdastyrý komıteti úshin joǵary marapat boldy.
El quramasy 100% medal kórsetkishine qol jetkizdi, olar tórt qola medal qanjyǵalady:
Ǵalymjan Baqtybaı — Astana qalasy daryndy er balalarǵa arnalǵan «Bilim-Innovatsııa» lıtseı-ınternatynyń 11 synyp oqýshysy;
Amına Tynyrbaı — Qyzylorda oblysy № 10 daryndy balalarǵa arnalǵan «Bilim-Innovatsııa» lıtseı-ınternatynyń 11 synyp oqýshysy;
Nurtóre Tórehanuly — Shyǵys Qazaqstan oblysy daryndy balalarǵa arnalǵan «Bilim-Innovatsııa» mamandandyrylǵan lıtseıiniń 11 synyp oqýshysy;
Dıas Súleımenov — Aqtóbe oblysy «Bilim- Innovatsııa» lıtseı-ınternatynyń 11 synyp oqýshysy.
Qazaqstan komandasynyń jetekshileri: Baýyrjan Smaılov — bıotehnologııa magıstri, IBO-2007 olımpıadasynyń kúmis júldegeri; Ernar Batyrjanov — Ýlsan ǵylym jáne tehnologııa ulttyq ınstıtýtynyń stýdenti (UNIST, Koreıa), bıologııadan halyqaralyq jáne respýblıkalyq olımpıadalardyń jeńimpazy.
International Biology Olympiad — oqýshylar arasyndaǵy eń myqty 7 olımpıadanyń biri.
Olımpıada kúnderi Qazaqstan 81 elden kelgen 305 jas bıolog pen 275 ǵalymnyń tájirıbe almasý alańyna aınaldy.
Bir apta boıy qatysýshylar bıohımııa, molekýlıarlyq bıologııa, bıoınformatıka jáne jan-janýarlardyń anatomııasy men fızıologııasy boıynsha eki teorııalyq, tórt praktıkalyq týrda synǵa tústi.
Barlyq tapsyrmalardy Qazaqstannyń jas bıologtary ázirledi.
Qatysýshylar men qonaqtar sondaı-aq elordanyń kórikti jerlerin aralady, Býrabaıda «Kóshpendiler álemi» etnoaýylynda bolyp, qazaq halqynyń salt-dástúrimen, mádenıetimen tanysty.
