Qazaq balalar fılmi «Ańshy balamen» tolyqty
ALMATY. 29 tamyz. QazAqparat - Bul fılmniń sıýjeti shynaıy ómirden alynǵan. Ony kınodramatýrg, jazýshy Smaǵul Elýbaı búgin Almatyda rejısser Erlan Nurmaǵambetov pen Begarys Elýbaıdyń «Ańshy bala» fılminiń BAQ ókilderine arnaıy kórsetiliminde aıtty.
Sháken Aımanov atyndaǵy «Qazaqfılm» kınostýdııasy túsirgen bul týyndynyń stsenarııin jazǵandar - Smaǵul Elýbaı, Erlan Nurmaǵambetov, Begarys Elýbaı. Qoıýshy sýretshisi - Aıtjamal Tastambekova, kompozıtory - Edil Qusaıynov, atqarýshy prodıýseri Ásel Erjanova. Onda basty rólderdi Sanurjan Súleımenov, Jánel Álikova, Júrsin Erman jáne taǵy basqa akterlar somdaıdy. Fılm qaladan jazǵy demalys kezinde qumda túıe baǵatyn atasyna kelgen Qambar degen bala týraly. Ol munda ańshylyqtyń qyr-syryn úırenip, keıin kórshi qyz Samaldyń jetim laǵyn jep ketken kóksholaq qasqyrdyń sońyna túsip, ony atyp alady.
«12 jasymda 19-20 jastaǵy aǵammen birge qaryndasymnyń laǵyn jep ketken qasqyrdan kek alý úshin izine túsken edik. Atqan kezde qansyrap úńgirge kirip ólgen qasqyrdy apanynan alyp shyǵýdy aǵam onyń ishine ózi syımaıtyn bolǵan soń maǵan júktedi. Onda ózge qasqyrlardyń bar-joǵyn bilmesek te men aǵama qorqam dep aıta almadym. Úreılensem de ony alyp shyqtym. Balalyq shaqtan bastan ótkizgen bul áserimdi men keıin osy fılm jelisine arqaý ettim», - deıdi S. Elýbaı. Onyń aıtýynsha, bul stsenarııdegi onyń alǵa qoıǵan maqsaty adam óz boıyndaǵy úreıdi eńsergen kezde ózge qıyndyqtyń bárin de jeńe alatynyn kórsetý. Bul rejısserlerdiń alǵashqy týyndysy bolǵandyqtan tuńǵysh ret onyń túsirilimi men jaryqqa shyǵýyna deıingi barlyq úderiske qatysqan. Bul kınodramatýrgtyń qazaq kıno ónerindegi 7-inshi kartınasy bolyp otyr. Fılm búginnen bastap qala kınoteatrlarynda jalpy kórermen qaýymnyń nazaryna usynylmaq.
