Qazaq balalar baspasózi jańa basylymmen tolyqty
ALMATY. 18 naýryz. QazAqparat - Almatyda «Výnderkınd KZ» dep atalatyn balalardyń tanymdyq jýrnaly jaryq kórdi. Qazaq, orys tilderinde aıyna bir ret shyǵatyn jańa basylymnyń bas redaktory Svetlana Ospanova.
«Tanys, bil, oılan, jatta, oqy, jaz» degen uranmen ómirge kelgen jýrnal balalarǵa entsıklopedııalyq bilim berýdi kózdeıdi. Ony turaqty oqyp, jınap júrgen oqyrmannyń árdaıym óziniń bilimi men dúnıetanymyn úzdiksiz jetildirýge múmkindigi bar.
«Jýrnaldyń ár sanynda biz álemdi sharlap, túrli memleketterge saıahat jasaımyz. Ár el týraly qyzyqty jaıttarǵa qanyq bolyp, álem ǵajaıyptarymen tanystyramyz. Olar - «Álem ǵajaıyptary», «Jıhangez», «Kim bolam?», «Qurmet taqtasy», «Ádeptilik mektebi», «Siz bilesiz be?», «Oına da, oıla!» degen sııaqty aıdarlarǵa toptastyrylady», - dedi S. Ospanova.
Jańa basylymǵa tilekshi bolyp, júrekjardy lebizin bildirgen belgili jýrnalıst Saıasat Beıisbaev: «Aty aıtyp turǵandaı «výnderkınd» óte erte jastan bárin bilip, zerek bolyp ósken, óz qatarynan oq boıy ozyq týǵan búldirshin. Basylymdy paraqtap, oqyp shyqqan búldirshinniń oı-órisi keńeeıip, sanasy tereńdeı túserine, zerdeli bolaryna kúmán joq. Aqyl-oıdyń kenishine aınalatyn, san alýan taqyryptardy qaýzaıtyn bul basylym áli-aq kóptegen balalardyń súıikti jýrnaly bolary kádik», - degendi aıtady.
