Qazaq-ázerbaıjan yntymaqtastyǵyn damytý: Oljas Bektenov Bakýge resmı saparmen bardy

ASTANA. KAZINFORM – Premer-mınıstr Oljas Bektenovtiń Bakýge resmı sapary aıasynda Ázerbaıjan Respýblıkasynyń Prezıdenti Ilham Álıev qabyldady. Qazaqstan Prezıdenti Qasym-Jomart Toqaevtyń jyly lebizi jetkizildi. Bul týraly Úkimettiń baspasóz qyzmeti habarlady. 

Eki memlekettiń basshylary arasyndaǵy senimdi qarym-qatynastyń arqasynda Qazaqstan-Ázerbaıjan yntymaqtastyǵy seriktestiktiń sapaly jańa deńgeıine kóterildi.

Ázerbaıjan Respýblıkasynyń Premer-mınıstri Álı Asadovpen úkimetaralyq kelissózder barysynda saýda-ekonomıkalyq yntymaqtastyq, kólik-logıstıka salasyndaǵy ózara is-qımyl, mádenı-gýmanıtarlyq baılanystardy damytý máseleleri talqylandy.

2024 jyly eki el arasyndaǵy taýar aınalymy $533 mln. Qazaqstan Ázerbaıjanǵa $340 mln-nan astam somaǵa shıkizattyq emes taýarlardyń 130 túrin jetkizýdi arttyrýǵa daıyn. Kólik-logıstıka salasyndaǵy ózara is-qımylǵa nazar aýdaryldy. Ótken jyly Transkaspıı halyqaralyq kólik baǵyty boıynsha júk tasymaldaý kólemi 62%-ǵa ósip, 4,5 mln tonnaǵa jetti. Eki eldiń temir joldary arasynda Digital Trade Corridor platformasyn ıntegratsııalaý aıaqtaldy.

Taraptar ekijaqty taýar aınalymyn neǵurlym joǵary deńgeıge kóterý úshin bar kúsh-jigerin jumsaýǵa nıetti ekenin rastady.

Kezdesýler qorytyndysy boıynsha ekijaqty birqatar qujatqa qol qoıyldy. Olardyń ishinde Qazaqstan-Ázerbaıjan baǵytyndaǵy sý asty talshyqty-optıkalyq baılanys jelisin jobalaý jáne salý jónindegi qujat bar. Joba baılanystyń sapasy men senimdiligin arttyrý, Azııa men Eýropa arasyndaǵy derekterdi berýdi keńeıtý úshin strategııalyq mańyzǵa ıe.

Sondaı-aq kelissózder barysynda eki eldiń mádenı-gýmanıtarlyq saladaǵy ózara is-qımyly talqylandy. Ázerbaıjan tarapy Qazaqstannyń Qarabaqty qalpyna keltirý úderisine qosqan úlesin joǵary baǵalady.

Aıta ketelik Ázerbaıjanda Kaspıı teńizi arqyly jolaýshylar aǵyny artqan edi.