Qazaq áıelderiniń ishinde Margaret Tetcher, Indıra Gandıden kem túspeıtin tulǵalar bar – QKHP ókili

AQTAÝ. QazAqparat - Búgin Qazaqstan kommýnıstik halyq partııasynyń Mańǵystaý oblysyndaǵy bólimshesi genderlik teńdik taqyrybynda pikirtalas uıymdastyrdy. Oıjarysqa kóshbasshy áıelder mektebiniń ókilderi, qoǵam belsendileri men jastar qatysty, dep habarlaıdy QazAqparat tilshisi.

Pikirtalasqa qatysýshylarynyń aıtýynsha, Mańǵystaýda memlekettik uıymdardyń 20 protsentin áıelder basqarady. Kórsetkish ózge óńirlermen salystyrǵanda joǵary. Alaıda, turǵyndardyń 52 paıyzyn názik jandylar quraıtyn aımaq úshin bul áli de jetkiliksiz, deıdi kommýnıstik partııa ókilderi.

«Áıelderdiń memleket isine aralasýyna qoldaý kórsetilse, qazaq áıelderiniń ishinen de Margaret Tetcher, Indıra Gandı, Benazır Bhýttodan kem túspeıtin tulǵalar shyǵady», - dep atap ótti QKHP Mańǵystaý oblystyq fılıalynyń birinshi hatshysy Roza Mahambetova.

Onyń sózine qaraǵanda, «áıelderdiń barlyǵyna birdeı quqyq berip, bárin bılik isine aralastyrsaq, ol bizge qandaı tabys ákeledi» dep oılaıtyn er azamattar da kezdesedi.

«Árıne, qoǵamda áıelderdiń genderlik teńdik máselesin ártúrli túsinetin kózqarastar, tipti qaıshylyqtar bar»,- dedi Roza Mahambetova.