Qazaq astyǵyn Parsy shyǵanaǵy elderine jetkizý joldary pysyqtalyp jatyr
ASTANA. KAZINFORM – Qazaqstan Vetnamǵa astyqtyń synaq partııasyn jetkizip jatyr. Bul týraly Aýyl sharýashylyǵy mınıstrliginen málim etti.
- Qazaqstannyń aýyl sharýashylyǵynda negizinen bıdaı, arpa, júgeri, qaraqumyq sııaqty dándi daqyldar basym. Jalpy, Qazaqstannyń tabıǵı-klımattyq jaǵdaılary aýyl sharýashylyǵy daqyldarynyń keń aýqymyn ósirýge múmkindik beredi. Memleket basshysynyń aýyl sharýashylyǵynyń jalpy ónim kólemin 2 esege arttyrý jónindegi tapsyrmasyn oryndaý boıynsha jol kartasy aıasynda mınıstrlik egis alqaptarynyń qurylymyn ártaraptandyrý jumysyn júrgizip jatyr. Ártaraptandyrýdyń negizgi mindeti – bıdaı monokýltýrasynyń, sondaı-aq sý kóp qajet etetin daqyldardyń (kúrish, maqta) alqaptaryn ońtaılandyrý jáne balamaly, joǵary rentabeldi daqyldardyń (maıly, kókónis-baqsha, azyqtyq jáne t.b.) kólemin ulǵaıtý, - dedi vedomstvodan.
Jalpy, ártaraptandyrý boıynsha qabyldanyp jatqan sharalar memlekettik qoldaý kólemin arttyrý, salalarǵa zamanaýı tehnologııalardy engizýmen birge óndiris kólemin arttyrýǵa, ósimdik sharýashylyǵy óniminiń ónimdiligi men sapasyn jaqsartýǵa, ónimdi qaıta óńdeý kásiporyndarynyń óndiristik qýattaryn júkteýge jáne olardy otandyq shıkizatpen qamtamasyz etýge, jemshóp bazasyn nyǵaıtýǵa alǵysharttar jasaıdy. Mysaly, bıyl maıly daqyldardyń alqaby 2024 jylmen salystyrǵanda 495,3 myń gektarǵa, dándik júgeri alqaby 7,4 myń gektarǵa ulǵaıdy. Bul jumys aldaǵy ýaqytta da jalǵastyrylady.
Sondaı-aq vedomstvo Qazaqstan astyǵynyń eksport geografııasy álemniń 45-ten astam elin qamtıtynyn atap ótedi. Bul rette Ortalyq Azııa, Aýǵanstan, Iran, Túrkııa, Qytaı jáne EO elderi dástúrli ótkizý naryqtary sanalady.
- Memlekettik qoldaý sharalarynyń arqasynda jańa naryqtar ashylýda. Atap aıtqanda. Norvegııa men Ulybrıtanııaǵa alǵash ret jetkizilimder júzege asyryldy. Sondaı-aq, 15 jylda alǵash ret Soltústik Afrıka elderine, atap aıtqanda Marokko men Mysyrǵa jetkizilimder qaıta jandandy. Qazaqstan astyǵynyń turaqty eksporttyq baǵytyn qalyptastyrý perspektıvasymen Parsy shyǵanaǵy elderine (BAÁ, Oman, Qatar) logıstıkalyq marshrýttar pysyqtalyp jatyr. Sondaı-aq Vetnamǵa astyqtyń synaq partııasyn jetkizý júrgizilýde, - dedi mınıstrlikten.
2024-2025 jyldardyń qyrkúıek–shilde aılarynda astyq pen unnyń astyq ekvıvalentindegi eksporty 12,4 mln tonnany qurady. Bul 2023/2024 jylǵy osyndaı kezeńmen salystyrǵanda 34 paıyzǵa (9,3 mln tonna) joǵary.