Qazaq astyǵy úshin qandaı jańa naryqtar ashyldy

ASTANA. KAZINFORM – 2025 jyldyń 9 aıynda 7,3 mln tonna astyq eksportqa shyǵaryldy. Bul týraly Májilistiń Agrarlyq máseleler komıtetinde astyqty tasymaldaýdyń ózekti máselelerine arnalǵan otyrysta Kólik vıtse-mınıstri Jánibek Taıjanov aıtty.

- Ótken jyly (2024 jyldyń qyrkúıegi men 2025 jyldyń tamyz aralyǵy) astyq tasymaldaý tabysty boldy. Atap atıqanda, sol kezeńde tasymal kólemi 13,3 mln tonnadan asyp, 45 paıyzǵa artty. Osy jyldyń 9 aıynda 9,6 mln tonna astyq tasymaldandy. Ósim ótken jyldyń 9 aıymen salystyrǵanda 40 paıyzǵa artqan. Onyń ishinde eksport – 7,3 mln tonna, respýblıka ishinde – 2,2 mln tonna, - dedi vıtse-mınıstr.

Onyń aıtýynsha, astyq eksportynyń negizgi baǵyttarynda oń qarqyn baıqalady. Máselen, Qytaı baǵytynda astyq kóleminiń tómendeýine qaramastan, un kólemi 2,2 mln tonnaǵa jetip, 4,6 esege ulǵaıdy. 

- Bul óńdeýshiler qosylǵan quny joǵary ónim shyǵarýdy arttyra túskenin dáleldeıdi. Sonymen qatar Ortalyq Azııa elderine tasymal kóleminiń 34 paıyzǵa artqany baıqalady. Aqtaý porty arqyly Iran baǵytyna da tasymal jandanyp, 3,3 ese artty. Aýǵanstanǵa 40 paıyzǵa ósim kórsetti. Reseı aýmaǵyna jáne osy el arqyly eksport 4,2 esege kóbeıdi. Ázerbaıjanǵa da artty, - dep túsindirdi spıker.

Baltyq mańy elderi jáne porttary arqyly eksport 14 esege, Reseıdiń Baltyq jáne Qara teńiz porttary arqyly 1,4 esege ulǵaıdy. Afrıka baǵytynda – Marokko, Aljır, sonymen qatar Vetnam men EO elderine jańa naryqtar ashyldy.

Aıta keteıik, elimizde qazirgi tańda 25,9 mln tonna astyq bastyryldy.