«Qazaq arýy» sulýlyq baıqaýyna kastıng jarııalandy
ALMATY. QazAqparat - «Qazaq arýy-2019» sulýlyq baıqaýyna kastıng jarııalandy. Bul týraly tanymal prodıýser, aktrısa Baıan Alagózova óziniń Instagram paraqshasynda jarııalady, dep xabarlaıdy QazAqparat tilshisi.
«Qazaq arýy» baıqaýynyń kastıngi 2-3 aqpan kúnderi Almaty qalasy, «Samal» yqshamaýdany, Qajymuqan kóshesi, 49, «ZMOOD» meıramxanasynda, al 8 aqpan kúni Astana qalasy, Qadyrǵalı Jalaıyr kóshesi 8, «The one hotel Astana» qonaq úıinde ótkiziledi. Ýaqyty - 12:00-den 18:00-ge deıin.
Sonymen qatar, Baıan Alagózova bul baıqaýdyń basty talaptarymen tanystyrdy.
«Qazaq tilin jetik meńgerý, kórikti ári kelbetti, aqyldy ári daryndy bolý, 16-22 jas aralyǵy, boıy 170 sm-den joǵary, salmaq 53 kg-nan tómen. Eger osy sıpattamaǵa saı bolsańyz, iske sát! Baıqaý uıymdastyrýshylary men altyn táj sizdi kútýde» - delingen aktrısanyń paraqshasynda.
Sonymen qatar, bul baıqaýda qazaq halqynyń tarıhy, ádebıeti men salt-dástúri týraly da habardar bolý qajet. Bul sulýlyq baıqaýy bolǵandyqtan, qatysýshylar bilimimen qatar sulýlyǵyn da kórsete alýy kerek.
Aıta ketý kerek, «Qazaq arýy» Qazaqstanda osymen toǵyzynshy ret uıymdastyrylady. Ótken jyly 20 jastaǵy aqtaýlyq arý Nábıra Rahymjan «Qazaq arýy» atanǵan bolatyn.
Elaman Turysbekov
