Qazaq arýy án keshin ótkizgeli jatyr
ALMATY. 25 qazan. QazAqparat /Erlik Erjanuly/ - Búgin Ońtústik Qazaqstan oblysynyń Jetisaı qalasynda Muhtar Áýezov teatrynyń aktrısasy, ánshi Lázzat Qaldybekovanyń «Asyǵamyn qol jetpes armanǵa» dep atalatyn alǵashqy án keshi ótedi.
«2011 jyl men úshin jáne otbasym úshin úlken jaqsylyqtarǵa toly boldy. Tuńǵysh ret uıymdastyrylǵan «Qazaq arýy» baıqaýynyń Bas jeńimpazy boldym. Estrada ánshisi retinde endi alǵashqy án keshimdi ótkizip otyrmyn. Oǵan Ýálıbek Ábdiraıymov, Janatbek Báıtekov, Zattybek Kópbosynov, NurMuqasan toby jáne taǵy basqa óner aldamdary qonaq bop qatyspaq», - deıdi Lázzat Ábishqyzy. Qazaqtyń memlekettik Muhtar Áýezov atyndaǵy akademııalyq drama teatry aktrısasynyń repertýarynda qazir turaqty oryn alǵan 10 shaqty án jınalǵan. Olardyń ishinde Jarylqasyn Dáýlettiń sózine jazylǵan Ermek Elgezekovtiń «Asyǵamyn qol jetpes armanǵa», Ermek Elgezekovtiń «Erkeleımin erkeletseń», halyq ánderi «Balapan qaz», «Ádemi qyz» sııaqty shyǵarmalar bar.
«Búgin táýelsizdiktiń 20 jyldyǵyna arnap týǵan qalamda kishigirim esep berý keshimdi ótkizip otyrmyn. Men úshin ózim qyzmet jasaıtyn teatrdyń orny erekshe. Degenmen ónerdiń ózge salalarynda da óz baǵymdy synap kórgim keledi. Oǵan teatrdyń dırektory jáne kórkemdik jetekshisi Esmuhan Obaev aǵamyz da ruqsatyn berip otyr. Alla qalasa, kelesi jyly án keshimdi Shymkent qalasynda ótkizbekpin», - dedi L. Qaldybekova.
