«Qazaq armatýra-oqshaýlaǵysh zaýytyna» 170 mln teńge ınvestıtsııa salynbaq
QOSTANAI. QazAqparat - QR Parlamenti depýtattarynyń Qostanaı óńirine sapary barysynda «Qazaq armatýra-oqshaýlaǵysh zaýytynyń» osy jyldaǵy jumys jospary talqylandy, dep habarlaıdy QazAqparat tilshisi.
Búgin Májilis tóraǵasynyń orynbasary Vladımır Bojko Rýdnyı qalasynda bolyp, birqatar óndiris oshaqtaryn aralady. Sonyń biri - «Qazaq armatýra-oqshaýlaǵysh zaýyty». Zaýyt dırektorynyń óndiris jónindegi orynbasary Tatıana Rybalkonyń sózinshe, shyny oqshaýlaǵyshtaryn qurastyrý isi 2013 jyldan bastaldy.
«Estonııanyń «Global Insýleıtor Grýpp» holdınginiń quramyna kiretin seriktestik Rýdnyıda 5 jyl boıy turaqty jumys istep kele jatyr. Biz daıyn shyny bólshekterin Reseı men Qytaıdan satyp alyp, jylyna 500 myń dana oqshaýlaǵysh qurastyramyz. 30 adam jumyspen qamtylǵan. Negizgi tutynýshylarymyz - Reseı men Ázerbaıjannyń iri elektr energııasyn tasymaldaýshy kompanııalary», - deıdi Rybalko.
Vladımır Bojko zaýyttyń bıylǵy jospary, eksporttyq áleýeti men ınvestıtsııalyq múmkindikteri týraly surady. Tatıana Rybalkonyń aıtýynsha, aldaǵy ýaqytta tsehtyń áleýetin eki esege arttyrý, qol stanoktaryn jartylaı avtomattyq konveıerlerge aýystyrý josparda bar.
«Osy arqyly óndiris kólemin 4 ese arttyryp, 20 qosymsha jumys ornyn ashýǵa múmkindik alamyz. Ol úshin 170 mıllıon teńge sheteldik ınvestıtsııa tartylmaq. Sóıtip, otandyq ónimdi Iran, Túrikmenstan, Pákistan jáne taǵy basqa azııalyq elderge eksportqa shyǵarýǵa múmkindik zor», - dedi Tatıana Rybalko májilismenniń suraǵyna.
Munan soń Vladımır Bojko «Sokolov-Sarybaı» ken óndirý basqarmasynda bolyp, kadrlardy daıarlaý ortalyǵy jumysyn baqylady.
