Qazaq arheologtary tarıhı qundy jádiger taýyp aldy
ASTANA. 2 qyrkúıek. - Qaraǵandylyq arheologtar oblys aýmaǵyndaǵy tarıhı-mádenı eskertkishterdi qalpyna keltirý jumystaryn jalǵastyryp jatyr. Jyl sońyna deıin 11 eskertkish jóndelmek. Sonyń biri - Baıdaly bı Beksheulynyń kesenesi.
Bul maqsatqa memleket qazynasynan 15 mıllıon teńge bólinip otyr. Arheologtar keseneni qalypqa keltirý kezinde balbal tas taýyp aldy. Tarıhshylar bul tas shamamen bizdiń dáýirimizge deıingi V ǵasyrda qoıylǵan qundy jádiger desedi. Bul týraly «Habardyń» saıtynan málim boldy.
Qýshoqy taýynan bastaý alyp, Ertis alabyndaǵy Shyǵanaq kóline quıatyn Shiderti ózeniniń arnaly tusy bul. Sonaý jyldary «Ertis-Qaraǵandy» kanaly osy ózenniń boıymen ótkendikten, bul mań tegis sý qoımasynyń astyna ketken. Sóıtip, jyldar ishinde aıdyn kól paıda bolady. Sol kóldiń ortasyndaǵy aralda Baıdaly bı jerlengen. Ádil bı, dýaly aýyzdy sheshen bolǵan Baıdaly bıdiń tóreligine jurt bas ıgen. «Segiz bıim, segiz bıimniń ishindegi semiz bıim», - dep Abylaı han baǵa beretin Baıdaly bı 95 jasynda dúnıeden ozady. Mazary shamamen 1820 jyldary salynǵan bolýy kerek. Bastapqy qalpynan tek irgetasy ǵana saqtalǵan. Qazir keseneni qalpyna keltirý jumystary júrgizilip jatyr.
Araldy qorshaǵan jasandy sý qoımasynyń tereńdigi 7 metrge jýyqtaıdy. Bir ereksheligi, sý deńgeıi jyl saıyn kóterilse de tóbe basyn ala qoımaǵan. Bul da bolsa Baıdaly bı jerlengen jerdiń kıesin ańǵartsa kerek. Arheologtar zertteý jumystaryn júrgizý kezinde osy mańnan balbal tas taýyp aldy. Tarıhshylar bul sonaý túrki zamanyna tıesili bolýy múmkin degendi aıtady.
Arheologtar qundy jádigerdi oblystaǵy tarıhı-ólketaný murajaıyna tapsyrýdy josparlap otyr.
