Qazaq anımatsııasyn damytýdyń bes jyldyq jospary ázirlenip jatyr

ASTANA. KAZINFORM — Elimizde jyl saıyn 5-7 anımatsııalyq fılm túsirip, prokatqa shyǵarý josparlanyp otyr. Bul týraly Mádenıet jáne aqparat mınıstri Aıda Balaeva málim etti. 

— Mańyzdy mindetterdiń biri — balalarǵa arnalǵan sapaly anımatsııalyq kontent ázirleý. Osy oraıda «Qazaqfılm» kınostýdııasy qazaq anımatsııasyn damytý boıynsha 5 jyldyq jospar ázirlep jatyr, — dedi Aıda Balaeva elordada ótken ardagerler keńesiniń plenýmynda.

Mınıstrdiń paıymdaýynsha, jylyna 5-7 anımatsııalyq fılm shyǵarý josparda bar.

— Sonymen qatar Prezıdenttiń Ulttyq quryltaıdyń ekinshi otyrysynda bergen tapsyrmasy aıasynda «e-Kıno» biryńǵaı monıtorıng júıesi ázirlendi. Bul júıe kıno salasyndaǵy ashyqtyqty arttyrýǵa, el boıynsha kassalyq túsimderdiń ádil bólinýin qamtamasyz etýge baǵyttalǵan, — deıdi vedomstvo basshysy.

Búgin elordada respýblıkalyq ardagerler uıymy keńesiniń kezekti plenýmy ótti. Oǵan elimizdiń barlyq óńirinen ardagerler keńesiniń tóraǵalary qatysty.

Buǵan deıin Aıda Balaeva el kınoteatrlarynda kórsetiletin fılmderdiń mazmunyna baqylaý kúsheıetinin málim etti.  Osy oraıda kıno týraly zańǵa birqatar ózgeris engizilmek.

Eske sala ketsek, byltyr Májilis depýtaty Danabek Isabekov otandyq anımatsııanyń qazirgi jaı-kúıi týraly depýtattyq saýal joldap, balalar jat ıdeologııa qurbanyna aınalǵanyn aıtqan edi.