Qazaq anımatsııasynyń negizin qalaýshy Ámen Qaıdardyń týǵanyna – 100 jyl

ALMATY. QazAqparat – 3 maýsym kúni qazaq anımatsııasynyń negizin qalaýshy, óner maıtalmany tiri bolsa 100-ge tolar edi. Osyǵan oraı Sháken Aımanov atyndaǵy «Qazaqfılm» kınostýdııasynyń «Qazaqanımatsııa» shyǵarmashylyq birlestigi mereıtoılyq shara ótkizdi.

Eskertkish memorıalǵa gúl qoıylyp, jınalǵandardyń nazaryna anımator eńbekteriniń tsıfrlandyrylǵan nusqasy kórsetildi, dep habarlaıdy QazAqparat tilshisi.

Іs-sharaǵa otandyq anımatsııa ardagerleri men qazaq anımatsııasynyń damýyna eleýli úles qosqan mádenıet qaıratkerleri qatysty.

Ámen Qaıdardyń tyrnaqtaldy týyndysy «Qarlyǵashtyń quıryǵy nege aıyr?» mýltfılmi bolatyn. Halyq ertegisi álemniń 50-ge jýyq elinde kórsetildi. Lenıngradtaǵy 3 Búkilodaqtyq kınofestıvaldiń laýreaty, mýltfılmder kınofestıvalinde qurmetti orynǵa ıe boldy. Ámen Qaıdardyń sondaı-aq, tanymal anımatsııalyq jumystary qatarynda «Aqsaq-qulan», «Quıyrshyq», «Qojanasyr - qurylysshy», «Kún shaǵylysy», «Sıqyrly kilem» bar.

Shara barysynda atalǵan mýltfılminiń tsıfrlandyrylǵan nusqasy kórsetilip, Ámen Qaıdardyń jeke qujattary men zattary qoıylǵan kórme uıymdastyryldy.

Sonymen qatar, qazaq anımatsııalyq kıno óneriniń atasy Ámen Qaıdardyń týǵanyna bir ǵasyr, ıaǵnı 100 jyl tolýyna oraı «Qazaqanımatsııa» shyǵarmashylyq birlestiginde QR Mádenıet mınıstrliginiń tapsyrmasymen, Ulttyq kınony qoldaý memlekettik ortalyǵynyń qoldaýymen túsirilgen «Ámen aǵanyń báıteregi» atty qysqametrajdy mýltfılminiń alǵashqy kórsetilimi ótti.