Qazaq anımatsııasynyń 50 jyldyǵyna oraı baıqaý jarııalandy
ASTANA. QazAqparat - Qazaq anımatsııasynyń 50 jyldyǵyna oraı baıqaý jarııalandy, dep habarlaıdy QazAqparat.
Sh.Aımanov atyndaǵy «Qazaqfılm» kınostýdııasy jáne «Jas órken» seriktestigine kiretin «Ulan», «Drýjnye rebıata» gazetteri men «Baldyrǵan», «Aq jelken» jýrnaldary birlese otyryp, qazaq anımatsııasynyń 50 jyldyǵyna oraı jas sýretshiler arasynda «Meniń súıikti mýltfılmim» atty shyǵarmashylyq baıqaýyn ótkizedi.
«Ústimizdegi jyl - qazaq anımatsııasy úshin aıtýly jyl. Osydan 50 jyl buryn, 1967 jyldyń kúzinde qazaq anımatsııasynyń alǵashqy mýltfılmi - «Qarlyǵashtyń quıryǵy nege aıyr?» kórermenge usynylǵan bolatyn. Biz qazaq anımatsııasynyń negizin qalaýshylardyń qaldyrǵan murasyna qurmetpen qaraımyz. Búginde «Qazaqfılm» zamanaýı tehnologııalardy qoldana otyryp, tolyqmetrli anımatsııalyq fılmderdi óndirýde. Olardyń birqatary halyqaralyq festıvalderden júldeli oryndardy ıelenip otyr. Bul baıqaýdy qazaq anımatsııasyn elimizdiń balalary arasynda nasıhattaý maqsatynda jasap otyrmyz» - dedi Sh.Aımanov atyndaǵy «Qazaqfılm» kınostýdııasynyń prezıdenti Baqyt Qaıyrbekov.
Baıqaý «Men jaqsy kóretin qazaq mýltfılmi» jáne «Meniń qııalymdaǵy keıipker» atty eki nomınatsııadan turady. Birinshi nomınatsııada qatysýshylar qazaq anımatsııalyq mýltfılmderiniń jelisinde salynǵan sýretterin nemese komıksterin jibere alady. Ekinshi nomınatsııa boıynsha qatysýshylardyń óz qııalynan týǵan, ertegi, ańyz-áńgime men mıftik keıipkerleri beınelegen shyǵarmashylyq jumystary qabyldanady. Barlyq sýretterdi salýda janr boıynsha erkindik beriledi.
Sondaı-aq, sheteldik mýltfılmder men keıipkerleri negizinde salynǵan sýretter qabyldanbaıtyny eskertildi. Tek qana qazaq anımatsııasyna qatysty bolýy tıis.
Baıqaýǵa elimizdiń barlyq mektep oqýshylary qatysa alady. Eńbekter 15 qazanǵa deıin qabyldanyp, 24 qazan kúni shyǵatyn «Ulan» gazetinde qorytyndysy jarııalanady. Sonymen qatar, úzdik jumystar «Aq jelken», «Baldyrǵan» jýrnaldary men «Ulan», «Drýjnye rebıata» gazetterinde jaryq kóredi.
Jumystardy «Qazaqfılm» AQ Anımatsııa bóliminiń mamandary baǵalaıdy. Jeńimpazdarǵa planshetter men yntalandyrý ıelerine syılyqtar men alǵys hattar tapsyrylady.
