Qazaq anımatsııasyna 50 jyl: Qazposhta arnaıy marka, Ulttyq Bank moneta shyǵardy
ASTANA. QazAqparat - Qazaq anımatsııasyna 50 jyl tolýyna oraı Qazposhta arnaıy poshtalyq marka, al Ulttyq Bank nomınaly 500 teńgelik «Qarlyǵashtyń quıryǵy nege aıyr» eskertkish kúmis monetasyn aınalysqa shyǵardy, dep habarlaıdy «QazAqparat» HAA tilshisi.
«Qazaqfılm» AQ-nyń habarlaýynsha, 50 jyl buryn Búkilodaqtyq Memlekettik kınematografııa ınstıtýtynyń túlegi, jas sýretshi Ámen Qaıdarov kórermen nazaryna óziniń dıplomdyq jumysy - «Qarlyǵashtyń quıryǵy nege aıyr» mýltfılmin usynǵan.
«Sol kezderi ol qazaq kıno óneriniń tyń salasy - qazaq anımatsııasynyń negizin qalaǵanyn bilmegen de shyǵar. Alaıda, sodan beri bul janr kóptegen belesterdi baǵyndyryp, qıyndyqtardy bastan keshirdi. Sondyqtan da, qazaq kınematografııasynyń órkendeýine úlken úles qosqan has sheberlerdiń qurmetine osyndaı is-sharalar kóptep ótkizilýi tıis»,- dedi «Qazaqfılm» AQ prezıdenti Baqyt Qaıyrbekov.
Qazposhta shyǵarǵan markanyń ólshemi 140h80 mm, nomınaly - 100 teńge. Taralymy - 6000 dana. Atalǵan markany poshtanyń barlyq bólimderinen, sonymen qatar «Qazposhta» AQ saıtynan satyp alýǵa bolady.
Poshta markasymen birge, QR Ulttyq Banki nomınaly 500 teńgelik «Qarlyǵashtyń quıryǵy nege aıyr» eskertkish kúmis monetasyn aınalysqa shyǵardy.
Kınokadr retinde jasalǵan monetalar 925 synamaly kúmisten jasalǵan. Nomınaldyń sol jáne oń jaǵynda ulttyq oıý-órnek elementteri ornalasqan. Monetanyń joǵarǵy bóliginde memlekettik tilde «Qazaqstan Respýblıkasy» jáne orys tilinde «Respýblıka Kazahstan» degen jazba bar. Tómengi bóliginde moneta daıyndalǵan metaldy, onyń synamasy jáne salmaǵynbildiretin «Ag 925 24 g.» degen jazba jáne Qazaqstan teńge saraıynyń taýar belgisi beınelengen. Sol jaǵynda monetanyń jıeginde anımatsııalyq fılmniń ekranǵa shyǵý jyly - «1967», oń jaǵynda moneta soǵylǵan jyl - «2017» ornalastyrylǵan. Monetanyń ekinshi jaǵynda anımatsııalyq fılmniń túrli-tústi kadry ornalasqan.
Nomınaly 500 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti. QR-nyń barlyq bankterinde shekteýsiz usaqtalyp, aıyrbastalady. Monetalardy Qazaqstan Respýblıkasy Ulttyq Bankiniń barlyq fılıaldarynda, sondaı-aq «Monetalardyń Internet-dúkeni» www.nationalbank.kz Qazaqstan Respýblıkasy Ulttyq Banki saıtynyń ınternet-dúkeni arqyly satyp alýǵa bolady.
Eske sala ketsek, Ámen Qaıdarovtyń mýltfılmi «Qarlyǵashtyń quıryǵy nege aıyr?» ertegi jelisi boıynsha jasalǵan. Bul mýltfılm eń alǵash 1967 jyly Máskeýde kórsetildi. Baldyrǵan ul-qyzdarymyzdy adaldyq pen meıirimdilikke tárbıelegen kórkem shyǵarma álemniń 48 elderinde kórsetilip, kóptegen halyqaralyq festıvalderde júldeli oryndardan kóringen. Daryndy sýretker Ámen Qaıdarovtyń sondaı-aq «Aqsaq qulan», «Quıyrshyq», «Qurylysshy Qojanasyr», «Kún sáýleli qoıan», «Qyryq ótirik» syndy basqa da týyndylardyń avtory. 
