Qazaq anımatsııalyq fılmi Reseıde tanystyryldy
ASTANA. QazAqparat- «balapan» telearnasy teleónimderin Astrahan qalasynda jergilikti qazaqtarǵa tanystyrdy, dep habarlaıdy QazAqparat tilshisi.
«balapan» telearnasy ujymy Astrahan qalasyndaǵy əıgili kúıshi Qurmanǵazy Saǵyrbaıulyna arnalǵan jıynǵa qatysyp, kúı qudiretin pash etken «Qońyr qaz» anımatsııalyq fılmin kópshilik nazaryna usyndy. Telearna dırektory Maqpal Jumabaı «balapan» telearnasy týraly jan-jaqty aqparat berip, balalar arnasyn Qazaqstan TV mobıldi qosymshasy arqyly onlaın kórý múmkindigin tanystyrdy.
Kezdesýge Astrahandaǵy ǵylymı qaýymdastyq pen zııaly qaýym ókilderi, óner ujymdary qatysty. Atap aıtsaq, kesh barysynda Qurmanǵazy Saǵyrbaıuly mýzeıiniń meńgerýshisi Ánııa Maqabaeva, Qurmanǵazy atyndaǵy aımaqtyq mádenı ortalyq dırektory Amangeldi Abylǵazıev, «Joldastyq» qazaq mádenı ortalyǵynyń qurmetti múshesi Ermek Álıev, Astrahan óner jáne mádenıet kolledjiniń oqytýshysy Qaırat Qazanbaev sóz alyp, «Samal» ansambli men «Shalqyma» halyq aspaptary ansambli óner kórsetti.
Kezdesý nátıjesinde, ózara rýhanı-mádenı baılanysty damytý boıynsha usynystar aıtylyp, oı-pikirler ortaǵa salyndy. «balapan» ujymy jınalǵandarǵa anımatsııalyq fılmder toptamasyn, estelik syılyqtar tartý etti.
«Qurmanǵazy - qazaq kúıiniń atasy. Al kúı - mádenıetti bala sanasyna sińirýdiń eń ońtaıly joly. Sondyqtan da qazaqtyń uly kúıshileriniń murasyn ákelip kórsettik. Odan bólek, Astrahandaǵy baýyrlarymyz otandyq telearnadan ana tilindegi baǵdarlamalardy mobıldi qosymshalar arqyly kórsetilimi tanystyryldy»,- dedi telearna dırektory Maqpal Jumabaı.
