Qazaq akteri túsken fılm Qytaıda bılet satylymy boıynsha rekord ornatty
ASTANA. QazAqparat - Qytaıda qazaq akteri basty rólderdiń birin somdaǵan «Erjúrek aspan sardary» fılmi prokatqa shyqqan birinshi kúni 19 mıllıon dollar qarjy jınaǵan. Bul tipti ataqty Djekı Chan kınolarynyń alǵashqy kúngi kórsetiliminde satylǵan bılet baǵasynan asyp tústi, dep habarlaıdy kazakh.people.com.cn.
Qytaı kórermenderiniń nazaryn aýdaryp, tánti etken «Erjúrek aspan sardary» fılmi Qytaı kınoındýstrııasyndaǵy bıylǵy jyldyń tabysty jobalarynyń biri boldy.
Qytaıda turatyn qandasymyz Muhtar Tileýǵazyuly «Erjúrek aspan sardary» fılminde Baıruń taıpasynan shyqqan batyr rólin tamasha somdap shyǵady. Jibek joly boıyndaǵy tarıhı oqıǵany baıan etken fılm tartymdylyǵymen kórermendi baýraǵan. Osylaısha, bul týyndy Qytaı kıno tarıhynda alǵashqy kúngi bıletter satylymy boıynsha rekord jańartty.
Muhtar Tileýǵazyuly - Qytaıdyń Іle qazaq avtonomııalyq oblysy, Kúnes aýdanynyń týmasy. Ol Qytaıdyń eń áıgili rejısserleriniń týyndylarynda bedeldi rólderde oınap, kórermenniń kóńilinen shyǵyp júr. Qazirgi kúni Qytaıdyń patshalary men batyrlarynyń rólin somdaýshylar arasynda joǵary suranysqa ıe akterlerdiń biri. Negizinen tarıhı fılmderge túsedi. Onyń juldyzyn jarqyratqan týyndy - Qytaıdyń Lý Chan esimdi belgili rejısseriniń «Patshanyń qonaǵasy» fılmi boldy. Bul tarıhı fılmde Muhtar Batys Han patshalyǵyn qurýǵa eńbek sińirgen ataqty sardar Fan Kýáıdiń rólinde oınaıdy. Kórermenge óziniń batyr kelbetimen, ártistik talantymen unaıdy.
Akter 2013 jyly «ıAń Gýıfı» (ıAń Gýıfı - Qytaı tarıhyndaǵy eń ataqty tórt arýdyń biri bolǵan) fılminde An Lýshan sardardyń rólin somdaıdy. Osy sekildi tarıhı fılmderde jarqyrap kóringen, talantty qandasymyz sońǵy tórt jyldyń ózinde-aq jıyrmadan astam kınoǵa túsken.
Muhtardyń ról somdaý barysyndaǵy ottaı janǵan kóz janary, batyrlarǵa tán kelbeti, at ústindegi saıyskerlik óneri jurtqa unaǵan. Bul rólderdi tamasha somdaýy onyń qazaq aýylynda týyp, bala kezinen batyrlar jyryn tyńdap, at jalynda oınap óskeniniń arqasy.
