Qazaq aqparat agenttigi arab qaripti tóte jazý jáne frantsýz tilinde saıt ashýdy josparlap otyr
ANA. Qyrkúıektiń 16-sy. QazAqparat /Marlan Jıembaı/ - Búgin Qazaq aqparat agenttiginiń baspasóz ortalyǵynda agenttik saıtynyń jańa dızaınynyń tanystyrylymy ótti. Agenttiktiń jańa dızaıny qyrkúıektiń 1-inde iske qosylǵan bolatyn.
Bas qosýda «Kontentti jetildirý, ony jańartý agenttik jumysyn jetildirý boıynsha holdıng tarapynan júrgizilip otyrǵan alǵashqy qadamdardyń biri», dep atap ótti «Arna Medıa» ulttyq aqparattyq holdıngi» AQ basqarmasy tóraǵasynyń birinshi orynbasary Qaısar Janahanov.
Baspasóz konferentsııasynda «QazAqparat» UK» AQ basqarmasynyń tóraǵasy Dáýren Dııarov agenttik Veb-saıtynyń múmkindigi mol zamanaýı portal deńgeıinde jańǵyrtylǵanyn, sonymen qatar arab grafıkasyn paıdalanyp, qazaq tilinde habar taratý josparlanyp otyrǵanyn jáne ol taıaý arada júzege asyrylatynyn atap ótti. Onyń aıtýyna qaraǵanda, jazýynda kırıll álipbıi qoldanylatyn bizdiń eldiń jańalyqtaryn Qytaıdaǵy qazaq jurty tegis oqı almaıtyndyqtan, ondaǵy qandastarymyz Qazaqstannan jetetin aqparatqa zárý. Tóte jazý úlgisimen jańa saıt shyǵarýdy qolǵa alǵan Qazaq aqparat agenttigi osy bastamasymen Qytaıdaǵy qandastarymyzben arada aqparattyq kópir ornatpaq nıette. Budan keıin frantsýz tilinde saıt ashý kózdelýde.
Agenttiktiń qazaq, orys, aǵylshyn tilderinde jáne latyn álipbıimen qazaq tilinde shyǵatyn saıttarynyń jalpy dızaıny ózgertilip, ol oqyrmanǵa qolaıly, kórneki ári tartymdy sıpat aldy. Agenttik saıtynyń jańa dızaınymen birge QazAqparat óz tutynýshylaryna múlde jańa ónimderin de usyndy.
Atap aıtqanda, QazAqparat búgingi tańda óziniń turaqty oqyrmandary men seriktesterine aqparatty meılinshe ońtaıly ári tıimdi jetkizý, taratý turǵysynan biregeı tehnologııalyq múmkindikter usynyp otyr.
Sonyń birinshisi - ınfografıka. Infografıka - kórneki qural bolǵandyqtan, oqıǵany, jańalyqty jedel qorytýǵa múmkindik beredi. Óıtkeni, kórneki keskin men sýretti sandar qashan da qabyldaýǵa ońaı, túsinýge jeńil. Sondyqtan, QazAqparat túrli statıstıkalyq málimetterge, kórneki quraldarǵa súıengen ınfografıkalyq ónimder shyǵarýdy qolǵa aldy. Túrli mańyzdaǵy jekelegen oqıǵa-jańalyqtardy ınfografıkamen bezendirýge kiristi.
QazAqparat usynǵan ekinshi jańalyq - aımaqtar kartasy.
«Aımaqtar» dep atalatyn aıdardy jetildire otyryp, Agenttigimiz is júzinde jańa ónim, ıaǵnı ár oblystyń jeke jańalyqtar saıtyn júrgizý deńgeıine shyqty. Buryn elimizdiń 14 oblysyna qatysty jańalyqtardyń bári ortaq aıdar - «Aımaqqa» toptastyrylyp kelse, endigi ýaqytta oblystarǵa qatysty jańalyqtar jeke -jeke jınaqtalyp, ár oblystyń áleýmettik-ekonomıkalyq tynys-tirshiligin derbes kórsetetin boldy. Mysaly, tintýirińizdi bizdiń saıttyń «Aımaq» aıdaryna janastyrsańyz, aldyńyzdan Qazaqstannyń geografııalyq kartasy ashylady. Osy kartadan ózińizge qajetti oblysty túrtseńiz sol aımaqqa qatysty barlyq jańalyqtardy taba alasyz. Muny sondaı-aq kartanyń tómengi jaǵyndaǵy oblystardyń tiziminen tańdaý arqyly da isteýge bolady.
QazAqparat aldaǵy ýaqytta osy aıdar boıynsha ár oblysqa qatysty bólimderdi sol aımaqtyń tarıhyna, basshylary men olardyń túrli bastamalaryna qatysty tolyqqandy aqparattarmen, sýrettermen tolyqtyryp otyrmaq.
Respýblıkalyq basylymdarǵa sholý. QazAqparat usynǵan jańa ónimderdiń biri - baspasózge sholý. Respýblıkalyq basylymdarǵa jasalatyn osy sholýda QazAqparat tilshileri ár gazettiń sol kúngi nómirinde jaryq kórgen asa mańyzdy jańalyqtar men maqalalarǵa qysqasha nazar aýdarýǵa tyrysady. Bul joba birinshi kezekte, mınıstrler men ákimderge, memlekettik qyzmetshilerge, bıznes ókilderine, sondaı-aq jalpy tutynýshylarǵa baǵyttalǵandyqtan, sol merzimdi basylymdarǵa degen qyzyǵýshylyqty týdyryp, oqyrmandar qataryn kóbeıtýge septigin tıgizedi. Ekinshi jaǵynan, sholýdyń orys tiline de aýdarylatyndyǵy sebepti ol qazaq baspasózinde qozǵalǵan keleli máselelerdiń orys tildi aýdıtorııaǵa da jetýine yqpal etpek.
