Qazaq agrotehnıkıkalyq ýnıversıtetinde Sáken Seıfýllınge arnalǵan kesh ótti

ASTANA. 11 qazan. QazAqparat - Búgin S.Seıfýllın atyndaǵy Qazaq agrotehnıkalyq ýnıversıtetinde qazaq zııalysy, qoǵam qaıratkeri, nar tulǵaly aqyn, jazýshy S.Seıfýllınniń týǵan kúnine oraı «Sáken taǵylymy» atty eske alý keshi ótti. Shara barysynda aldymen aqyn eskertkishine gúl shoqtaryn qoıý rásimi boldy.

Bul týraly joǵarǵy oqý ornynyń baspasóz qyzmeti habarlady.

Gúl shoqtaryn qoıý rásimi kezinde sóz alǵan ýnıversıtet rektory Aqylbek Kúrishbaev belgili qoǵam qaıratkeriniń ómir joly týraly aıta kelip, aqyn atymen atalǵan ýnıversıtette oqý ár stýdentke azamattyq jaýapkershilik júkteıtinine toqtaldy.

Sonymen qatar, 1 mınýttyq únsizdik jarııalanyp, baba rýhyna taǵzym etildi.

Sáken Seıfýllınniń týǵan kúnine arnalǵan kezdesý keshi barysynda sóz alǵan Qazaqstan Respýblıkasy Parlamenti Májilisiniń depýtaty, jazýshy, QR Memlekettik syılyǵynyń laýreaty Aldan Smaıyl aqynnyń tar jol taıǵaq keshken ómir joldarynan dáris oqyp, jýrnalıstik qyrlaryna da erekshe toqtalyp ótti.

Stýdentter tarapynan depýtatqa qoıylǵan saýaldar qatarynda Sákentaný týraly jáne Aldan Smaıyldyń depýtattyq jumysyna qatysty da kókeıtesti suraqtar boldy.

Eske alý barysynda Sáken Seıfýllın ánderin S.Seıfýllın atyndaǵy Qazaq agrotehnıkalyq ýnıversıtetiniń veterınarııa jáne mal sharýashylyǵy fakýltetiniń stýdenti Nurtaı Sháken asqaqtata sheber oryndady.

Bul shara - ulylardy ulyqtaý maqsatyndaǵy urpaq jaýapkershiliginiń artqanynyń bir kórinisi boldy.