Qazaq agrotehnıkalyq ýnıversıtetinde «Alǵashqy stýdenttik kúz» dástúrli baıqaýy márege jetti
ASTANA. Qazannyń 4-i. QazAqparat /Gúlmıra Álıakparova/ - Ótken senbi kúni Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń birinshi kýrs stýdentteri arasynda ótken «Alǵashqy stýdenttik kúz» dástúrli baıqaýy úlken gala-kontsertpen aıaqtaldy.
«Alǵashqy stýdenttik kúz» baıqaýy ýnıversıtet qabyrǵasynda osymen 13 jyl qatarynan ótkizilip keledi. Baıqaýdyń basty maqsaty - 1 kýrs stýdentterin bir-birimen etene tanystyrý, olardyń arasynan belsendi de talanttylardy anyqtap, yntalandyrý.
Úsh kúnge sozylǵan óner dodasyna 8 fakýltetten barlyǵy 600-ge jýyq birinshi kýrs jáne olardy kontsertke daıyndaýmen aınalysqan 400-ge jýyq joǵary kýrs stýdentteri qatysty.
Baıqaýshylar «án-bı» janrynda, qazaqtyń ulttyq jáne zaman aǵymyna saı áýender men bılerdi usynsa, «aspazshy» janrynda jeke jáne orkestr bolyp dombyra, jetigen, daýylpaz, syldyrmaq syndy aspaptarda ónerlerin kórsetti. «Mánerlep oqý» saıysynda avtorlyq jáne tanymal aqyndardyń óleńderin, sondaı-aq bıyl 53 jyldyǵyn atap ótip otyrǵan Agrarlyq ýnıversıtetke óz arnaýlaryn joldady. «Kóńildiler men tapqyrlar» utqyr ári utymdy qaljyndarmen kórermenderdi kúlkige bólese, «tańǵaldyrarlyq janrynda» jastar, sabyndy kópirshikter shoý-baǵdarlamasyn, parodııalardy, akrobatıkalyq jáne taǵy da basqa ónerlerin ortaǵa saldy.
Qazylar alqasynyń tóraǵasy, oqý ornynyń Tárbıe jumystary jáne áleýmettik máseleler jónindegi prorektory Aleksandr Maıerdiń aıtýynsha, bul bilim ordasyna túsetin stýdentterdiń arasynda talapty ári talantty jastardyń sany jyldan jylǵa artyp keledi jáne olar «Alǵashqy stýdenttik kúz» baıqaýynda qazylar alqasyn ózderiniń ónerlerimen shynaıy tań qaldyrady.
Eń úzdik shyqqan nómirler gala-kontsertke tańdap alynyp, onyń barysynda jeńimpaz fakýltetter jarııalandy. Qazylar alqasynyń sheshimimen birinshi oryndy - energetıka, ekinshi oryndy - ekonomıka jáne úshinshi oryndy jerge ornalastyrý fakýltetteri ıelendi.
Aıta keteıik, ústimizdegi qarashada qalyptasqan dástúr boıynsha Kongress-Holl saraıynda osy jastardy stýdentter qataryna qabyldaý saltanaty ótedi.
