Qazaq agrotehnıkalyq ýnıversıtetinde «Alǵashqy stýdenttik kúz» dástúrli baıqaýy bastaldy
ASTANA. Qyrkúıektiń 29-y. QazAqparat /Gúlmıra Álıakparova/ - Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń tabaldyryǵyn jýyrda ǵana attaǵan birinshi kýrs stýdentteri «Alǵashqy stýdenttik kúz» atty dástúrli shyǵarmashylyq baıqaýda ózara synǵa túsýde.
Ýnıversıtettiń Tárbıe jumystary jáne áleýmettik máseleler jónindegi prorektory Aleksandr Maıerdiń aıtýynsha, «Alǵashqy stýdenttik kúz» baıqaýy ýnıversıtet qabyrǵasynda 1997 jyldan beri dástúrli uıymdastyrylyp keledi jáne ol oqý ornynyń tabaldyryǵyn alǵash attaǵan stýdentterge arnalǵan birinshi is-shara bolyp tabylady.
«Onyń basty maqsaty - 1 kýrs stýdentterin bir-birimen tanystyrý, olardy alǵashqy kúnderden uıymshyldyqqa baýlyp, ujymdastyrý. Dál osy baıqaýda talapty da talantty jastardy anyqtap, boıdaǵy ónerlerin shyńdaýǵa yntalandyrý úshin bar múmkindikterdi jasaıtyn bolamyz. Óıtkeni bizdiń ýnıversıtet oqý úrdisin ǵana emes, sonymen qatar sport, mádenıet, tárbıe syndy stýdenttik ómirdiń barlyq baǵyttaryn qamtıdy», dedi ol.
Ereje boıynsha baıqaýǵa qatysýshy 8 fakýltet - mýzykalyq aspaptarda oınaý, mánerlep óleń oqý, jeke jáne jup bolyp án aıtyp, bı bıleý atalymdarynda synǵa túsetin bolady. Sondaı-aq kórermender men qazylar alqasyna tańǵaldyrarlyq ónerlerin kórsetip, búgingi ómirdiń túıitkilderine qatysty ótkir, ári ádemi qaljyndardy usynýy tıis. Ádilqazylar alqasy sonymen qatar, kontserttik baǵdarlamanyń uıymdastyrylýy men onyń sapasyn baǵalaıtyn bolady.
Qyrkúıektiń 28-i kúni bastalǵan baıqaý úsh kúnge jalǵasyp, onyń sońy gala-kontsertpen aıaqtalady. Jeńimpaz fakýltetter rektorat atynan aqshalaı syılyqqa ıe bolady. Bıyl eń úzdik kontserttik qoıylym men jeke oryndaýshylarǵa ózderiniń baǵaly syılyqtaryn Stýdenttik kásipodaq pen «Lıga Jas StaR» kreatıv agenttigi de taǵaıyndap otyr.
