Qazaq agrotehnıkalyq ýnıversıteti Eýropalyq Odaqtyń grantyn jeńip aldy

ASTANA. QazAqparat - Astanadaǵy S.Seıfýllın atyndaǵy qazaq agrotehnıkalyq ýnıversıteti Eýropalyq Odaqtyń naqty aýyl sharýashylyǵy boıynsha oqý baǵdarlamalaryn jańǵyrtý jónindegi grantyn jeńip aldy. Bul týraly ýnıversıtet rektory Aqylbek Kúrishbaev óziniń Feısbýk paraqshasyna jazdy, dep habarlaıdy QazAqparat tilshisi.

«Ýnıversıtet óz tarıhynda alǵash ret Eýropalyq odaqtyń zamanaýı tehnologııany qoldaný arqyly naqty aýyl sharýashylyǵy boıynsha oqý baǵdarlamalaryn jańǵyrtý jónindegi grantyn jeńip aldy. Árıne, biz buǵan deıin de kóptegen halyqaralyq jobalarǵa qatystyq, biraq, qosymsha oryndaýshy retinde. Endigi jerde bizdiń ýnıversıtet Eýropalyq Odaqtyń jobasynda basty bolyp tabylady, ıaǵnı jobany ózimiz basqaryp, oǵan bólingen qarjyny ózimiz retteıtin bolamyz», - dep jazdy atalǵan JOO-nyń rektory.

Onyń aıtýynsha, aýyl sharýashylyǵyna arnalǵan granttyń qosymsha oryndaýshylary Germanııa, Chehııa, Bolgarııa, Ózbekstan jáne Túrikmenstan eliniń ýnıversıtetteri.

Sondaı-aq, A.Kúrishbaev elimizde ǵylymǵa arnalǵan granttarǵa baıqaý ótkizýde Eýropa komıssııasynyń tájirıbesin úırený kerektigin aıtyp ótti.