Qazaq agrotehnıkalyq ýnıversıteti Aýyl sharýashylyǵy mınıstrliginiń qaramaǵynan shyǵyp, Bilim mınıstrligine ótkisi keledi
ASTANA. 2 maýsym. QazAqparat /Qanat Mámetqazyuly/ - Astanadaǵy S. Seıfýllın atyndaǵy Qazaq agrotehnıkalyq ýnıversıteti Aýyl sharýashylyǵy mınıstrliginiń qaramaǵynan shyǵyp, Bilim jáne ǵylym mınıstrliginiń qaramaǵyna ótkisi keledi. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Husaıyn Ýalıev osylaı málim etti.
Depýtattyń atyna atalǵan ýnıversıtettiń bir top oqytýshy-professorlar quramy oqý ornyndaǵy jaǵdaıǵa alańdaýshylyq bildirip hat joldaǵan kórinedi. «2005 jyly QazATÝ Bilim jáne ǵylym mınıstrliginen Aýyl sharýashylyǵy mınıstrligine ótken bolatyn. Sondyqtan ótken 6 jyl boıy ýnıversıtet agrarlyq vedomstvonyń qurylymyndaǵy jalǵyz joǵary oqý orny bolyp keldi. Qazirgi tańda oqý ornynda bakalavrıat boıynsha 38 mamandyqta oqytylsa, onyń tek 12-siniń ǵana tikeleı agrarlyq sektorǵa qatysy bar bolyp tabylady. Al ondaı mamandyqtarda bilim alatyn stýdentter kontıngenti jalpy oqýshylardyń 20 paıyzyn ǵana quraıdy», - deıdi depýtat. Onyń aıtýynsha, salalyq mınıstrliktiń quramynda bolǵandyqtan, QazATÝ Bilim mınıstrliginiń ǵylymı-tehnıkalyq baǵdarlamalaryna qatysýdan da shettelip jatqan kórinedi. «Ýnıversıtet ujymy Qazaq agrotehnıkalyq ýnıversıtetin Bilim jáne ǵylym mınıstrliginiń qaramaǵyna berý múmkindigin qarastyrýdy suraıdy», - deıdi H. Ýálıev.
