Qazaq agrotehnıkalyq ýnıversıteti aýmaǵynda stýdentterge arnalǵan 9 qabatty jańa jataqhana salynady
ASTANA. 11 mamyr. QazAqparat - Birer aılardan soń Astanadaǵy Qazaq agrotehnıkalyq ýnıversıtetiniń aýmaǵynda stýdentterge arnalǵan 9 qabatty jańa jataqhananyń qurylysy bastalady.
Bul týraly keshe ýnıversıtet rektory Aqylbek Kúrishbaev málim etti.
«Bıyl QR Úkimeti men Bilim jáne ǵylym mınıstrligi atalmysh máseleni sheshý boıynsha jasalǵan usynysymyzdy qoldap, 1 mlrd. teńgege jýyq qarajat bóldi. Birer aılardan soń QazATÝ aýmaǵynda stýdentterge arnalǵan 9 qabatty 592 oryndyq jańa jataqhananyń qurylysy bastalady», - dep atap kórsetti ol.
A. Kúrishbaevtyń aıtýynsha, ýnıversıtette tek stýdentterdiń 45 paıyzy ǵana jataqhanamen qamtamasyz etilgen. Sońǵy ret munda jataqhana 35 jyl buryn, ıaǵnı 1977 jyly salynǵan.
«Bul jaǵdaı stýdenttik ortada úlken alańdaýshylyq týǵyzyp otyr. Ásirese, basqa qalalardan kelgen jastar úshin aýyr tıedi. Sondyqtan da jataqhana máselesi biz úshin asa ózekti», - dep atap kórsetti ol.
