Qazaq agrotehnıkalyq ýnıversıtetinde qaldyqtardy basqarý zerthanasy ashyldy
ASTANA. KAZINFORM — Sáken Seıfýllın atyndaǵy Qazaq agrotehnıkalyq zertteý ýnıversıteti bazasynda «Qaldyqtardy basqarý» zerthanasynyń ashylý rásimi ótti. Joba Túrik yntymaqtastyq jáne úılestirý agenttigi (TİKA)-men birlesip júzege asyryldy. Bul týraly AShM málim etti.
Saltanatty sharaǵa Túrkııanyń birinshi hanymy Emıne Erdoǵan, sondaı-aq Qazaqstannyń salalyq mınıstrlikteriniń ókilderi men ýnıversıtet basshylyǵy qatysty. Emıne Erdoǵannyń sapary ekologııa salasyndaǵy Qazaqstan men Túrkııa arasyndaǵy ekijaqty yntymaqtastyqtyń joǵary deńgeıin aıqyndady.
Óz sózinde Emıne Erdoǵan zerthananyń ashylýy Qazaqstan men Túrkııa arasyndaǵy yntymaqtastyqty odan ári nyǵaıtýda mańyzdy ról atqaratynyn atap ótti.
— TİKA qoldaýymen Sáken Seıfýllın atyndaǵy Qazaq agrotehnıkalyq zertteý ýnıversıteti janynan ashylǵan zerthana nóldik qaldyq, turaqty aýyl sharýashylyǵy, qaldyqtardy basqarý jáne aınalym ekonomıkasy baǵyttaryndaǵy mańyzdy bastamalarǵa jol ashady dep shynaıy senemin. Bul mańyzdy bastama Túrkııa men Qazaqstan arasyndaǵy baýyrlastyq baılanystardy odan ári nyǵaıtýǵa qyzmet etsin, — dedi Emıne Erdoǵan.
Basqarma tóraǵasy – rektor, QR UǴA akademıgi, professor Qanat Tireýov zerthananyń ashylýy ýnıversıtettiń jańa býyn mamandaryn daıarlaý, qoldanbaly zertteýlerdi damytý jáne zamanaýı ekologııalyq sheshimderdi engizý múmkindikterin keńeıtetinin aıtty.
— Búginde Seifullin University agrarlyq bilim, ǵylym jáne ınnovatsııa salasyndaǵy halyqaralyq ortalyq retinde jahandyq deńgeıge senimdi qadam jasap keledi. Jańa zerthananyń ashylýy mamandar daıarlaýǵa, ekologııalyq mádenıetti damytýǵa jáne turaqty sheshimderdi engizýge qosymsha múmkindik beredi, — dedi Qanat Tireýov.
Zerthana ekologııa, tabıǵatty paıdalaný jáne agroekojúıeler baǵyttary boıynsha stýdentterdiń tájirıbege baǵyttalǵan daıarlyǵyn damytýǵa yqpal etedi. Munda stýdentter qaldyqtardy bólek jınaý, suryptaý, qaıta óńdeý jáne kádege jaratý salalarynda tájirıbelik daǵdylar meńgerip, ǵylymı zertteýlerge, jobalyq jumystarǵa, resýrsty únemdeý men «jasyl» tehnologııalardy engizý sheshimderin ázirleýge qatysa alady.
Aıta keteıik, jaqynda Astanada qaldyqtardy baqylaýdyń tsıfrlyq júıesi alǵash ret engizildi.
