Qazaq agrarlyq zertteý ýnıversıtetiniń 5 jyldyq damý baǵdarlamasy bekitilmek
ASTANA. KAZINFORM — Qazaq ulttyq agrarlyq zertteý ýnıversıtetiniń 5 jylǵa arnalǵan damý baǵdarlamasy bekitilmek. Úkimettiń atalǵan baǵdarlamaǵa qatysty qaýly jobasyn kelisý protsedýrasynan ótkizip jatyr.
— Qazirgi ýaqytta Qazaq ulttyq agrarlyq zertteý ınstıtýtynyń 2026-2030 jyldarǵa arnalǵan damý baǵdarlamasyn bekitý týraly Úkimet qaýlysynyń jobasy belgilengen tártippen múddeli memlekettik organdarmen kelisý protsedýrasynan ótip jatyr. Baǵdarlamany iske asyrý respýblıkalyq bıýdjetten qarajat talap etetinin eskere otyryp, Aýyl sharýashylyǵy mınıstrligi aldaǵy ýaqytta Respýblıkalyq bıýdjet komıssııasynda qaraý úshin qarjy-ekonomıkalyq negizdemesin kelisý protsedýrasyn júrgizip jatyr, — delingen Premer-mınıstr Oljas Bektenovtiń Senat depýtattarynyń saýalyna bergen jaýabynda.
Sonymen qatar Úkimet basshysy bastalǵan ınvestıtsııalyq jobalardy aıaqtaý úshin beıindi ǵylymı-zertteý ınstıtýttary men tájirıbelik sharýashylyqtardy senimgerlik basqarý kelisimsharttaryn uzartýǵa qatysty usynysqa da jaýap berdi.
— «Aktsıonerlik qoǵamdar týraly» zańǵa sáıkes, senimgerlik basqarý máselesi «Ulttyq agrarlyq ǵylymı bilim berý ortalyǵy» UAQ dırektorlar keńesiniń quziretine ǵana kiredi. Osyǵan oraı tıisti sheshimdi atalǵan enshiles uıymdardyń senimgerlik basqarý aıasyndaǵy qyzmet qorytyndysyn qarastyrý nátıjesi boıynsha ortalyqtyń dırektorlar keńesi qabyldaıdy, — dedi ol.
Buǵan deıin 2030 jylǵa qaraı agroónerkásip keshenine 63 myń maman qajet bolatynyn jazǵan edik.