Qazaq ádebıetiniń asa kórnekti ókili Kúlásh Ahmetova ómirden ozdy

ASTANA. KAZINFORM — Qazaq poezııasynda aıryqsha iz qaldyrǵan aqyn, memlekettik syılyqtyń laýreaty Kúlásh Ahmetova ómirden ótti, dep habarlaıdy Mádenıet jáne aqparat mınıstrliginiń baspasóz qyzmeti.

Mınıstrlik qazaq ádebıetiniń asa kórnekti ókili, Memlekettik syılyqtyń laýreaty, «Parasat» jáne «Qurmet» ordenderiniń ıegeri Kúlásh Ahmetovanyń ómirden ótýine baılanysty otbasy men jaqyndaryna, kúlli ádebı qaýymǵa, týǵan halqyna qaıǵyra kóńil aıtady. 

— Kúlásh Ahmetova — óziniń názik lırızmimen, azamattyq asqaq únimen, ulttyq rýhanııatqa sińirgen ólsheýsiz eńbegimen qazaq poezııasynda aıryqsha iz qaldyrǵan tulǵa. Qazaq poezııasynyń aq gúli atanǵan aqynnyń ár jyldary jaryq kórgen «Aq gúlim meniń», «Sen meniń baqytymsyń», «Bulaqtaǵy juldyzdar», «Meıirim», «Japyraq — jazdyń júregi» sekildi jyr jınaqtary oqyrman júregine jol taýyp, birneshe býynnyń estetıkalyq talǵamyn qalyptastyrdy. Ulttyq mádenıettiń damýyna súbeli úles qosqan aqynnyń jarqyn beınesi, ultqa sińirgen eńbegi men rýhanı murasy halqynyń jadynda máńgi saqtalady. Ónegeli ómiri men shyǵarmashylyq murasy jas urpaq úshin úlgi bolyp qala beredi. Marqumnyń topyraǵy torqa, ımany joldas bolsyn, — delingen habarlamada.

Budan buryn qazan aıynda kórnekti jazýshy, esseıst, ádebıettanýshy-ǵalym, fılologııa ǵylymdarynyń kandıdaty, Qazaqstan Jazýshylar odaǵynyń múshesi, Qazaqstannyń eńbek sińirgen qaıratkeri Maqsat Táj-Murattyń dúnıeden ótkeni málim boldy.